Ózbekstan Respublikası Prezidenti Shavkat Mirziyoev hám Kuveyt Mámleketi Ámiri Shayx Mishyal as-Saboh 17-fevral kúni Al-Kuveyt qalasındaǵı «Al-Bayan» sarayında tar sheńberde ushırasıw hám rásmiy delegaciyalar aǵzalarınıń qatnasıwında sóylesiw ótkerdi.

Sóylesiw aldında mámleketimiz basshısı kórsetilip atırǵan qızǵın qabıllaw hám joqarı itibar ushın Ámirge minnetdarshılıq bildirip, Kuveyt jetekshisi hám dos xalqın jaqınlasıp kiyatırǵan milliy bayramlar menen shın kewilden qutlıqladı.
Ózbekstan menen Kuveyt arasındaǵı doslıq hám kóp táreplemeli sheriklik qatnasıqların jáne de rawajlandırıw hám bekkemlew máseleleri kórip shıǵıldı.
Prezidentimiz Kuveytte tabıslı ámelge asırılıp atırǵan, maqset hám wazıypaları Jańa Ózbekstannıń rawajlanıw strategiyasınıń uzaq múddetli tiykarǵı baǵdarlarına únles bolǵan «Nigoh-2035» mámleketlik baǵdarlamsın ayrıqsha atap ótti.
Jedel siyasiy sóylesiwler hám uyımlararalıq almasıwlar, óz-ara tovar almasıw hám investiciyalar kólemi turaqlı artıp baratırǵanı qanaatlanıwshılıq penen atap ótildi.
Ótken jılı Húkimetleraralıq komissiyanıń birinshi májilisi nátiyjeli ótkerildi, bir qatar áhmiyetli isbilermenlik ilajları shólkemlestirildi.
Sawda-ekonomikalıq, investiciyalıq, innovaciyalıq hám qarjı-texnikalıq tarawlardaǵı birge islesiw máselelerine ayrıqsha itibar qaratıldı.
«Jasıl» energetika, sanaat kooperaciyası, awıl xojalıǵı, transport hám logistika, infrastruktura, qala qurılısı, densawlıqtı saqlaw, turizm tarawları ámeliy birge islesiwdiń tiykarǵı baǵdarları sıpatında belgilendi.
Birgeliktegi joybarlardı alǵa qoyıw maqsetinde Investiciya platforması hám Isbilermenler keńesi sıyaqlı mexanizmlerdi jolǵa qoyıw, sonday-aq, Al-Kuveyt qalasında sawda úyin ashıw boyınsha kelisimge erisildi.
Jańa sheriklik baǵdarlaması sheńberinde Kuveyt arab ekonomikalıq rawajlanıw fondı menen joybarlar portfelin keńeytiwge ayrıqsha itibar qaratıldı.
Bunnan tısqarı, Ózbekstan hám Kuveytte mádeniyat hám turizm hápteliklerin ótkeriw, eki mámleket wákilleriniń kórkem óner, muzıka, kino, bilimlendiriw hám sport tarawlarındaǵı mádeniy-gumanitarlıq ilajlarda belsene qatnasıwına járdemlesiwge kelisip alındı.
Ushırasıwda Birlesken Milletler Shólkemi, Islam birge islesiw shólkemi, Shanxay birge islesiw shólkemi, Qosılmaw háreketi hám basqa da abıraylı strukturalar sheńberinde óz-ara qollap-quwatlawdı dawam ettiriw zárúr ekenligi atap ótildi.
Usı jıl may ayında Samarqand qalasında ótkeriletuǵın «Oraylıq Aziya – Arab qoltıǵı mámleketleri birge islesiw keńesi» sóylesiwi sammitine tayarlıq kóriw hám onı ótkeriw boyınsha birgeliktegi ilajları dodalandı.
Jetekshiler xalıqaralıq hám regionallıq áhmiyetke iye tiykarǵı máseleler boyınsha da pikir alıstı.
Sóylesiwler juwmaǵında eki mámleket basshıları keń kólemli sheriklikti rawajlandırıw hám bekkemlewge qarar etti.
Sóylesiwler sońında Ózbekstan Prezidenti Kuveyt Ámirin mámleketimizge sapar menen keliwge usınıs etti.

ÓzA