Ózbekstan Respublikası Prezidentiniń 2023-jıl 25-dekabrdegi «2024-2026 jıllarda Ózbekstan Respublikasiniń sociallıq hám óndirislik infrastrukturasın rawajlandırıw ilajları haqqında»ǵı qararı tiykarında Shımbay rayonı Mektepke shekemgi hám mektep bilimlendiriwi bólimine qaraslı 25 hám 41-sanlı ulıwma orta bilim beriw mekteplerine kapital rekonstrukciya jumısların júrgiziw hám 18-sanlı mektepke shekemgi bilimlendiriw shólkemin jańadan qurıw belgilenip, ótken jılı usı obyektlerde qurılıs shólkemleri tárepinen jumıslar baslanǵan edi.

Jaqında usı bilimlendiriw dárgaylarında qurılıs jumısları tolıq juwmaqlanıp, olar xalıq iygiligi ushın paydalanıwǵa tapsırıldı.
Jańa imaratlardıń tapsırılıw máresimine Qaraqalpaqstan Respublikası Mektepke shekemgi hám mektep bilimlendiriwi ministrligi hám rayon basshıları, deputatlar, aymaq turǵınları qatnastı.
Ilajda rayon hákimi Aybek Tajetdinov hám basqalar imaratlardıń ashılıwı menen qutlıqlap, sońǵı jılları Ózbekstan Respublikası Prezidentiniń arnawlı qararları tiykarında elimizde, sonıń ishinde, rayon aymaǵında ámelge asırılıp atırǵan jumıslar hám unamlı nátiyjeleri haqqında keń túrde aytıp, bunıń ushın Jurtbasshımızǵa óz minnetdarshılıqların bildirdi.
Bunnan soń imarat aldına tartılǵan dástúriy lentalar kesilip, ilaj qatnasıwshıları bilimlendiriw mákemelerinde jas áwladlarımız ushın jaratılǵan sharayatlar menen jaqınnan tanısıp, olarǵa ózleriniń unamlı bahaların berdi.
-Mektebimiz 1970-jılı qurılǵan bolıp, oqıwshılarımız eki mezgilde oqıytuǵın edi,-deydi 25-sanlı ulıwma orta bilim beriw mektebiniń direktorı Sulayman Satullaev.-Mine, búgin húrmetli Prezidentimizdiń arnawlı qararı tiykarında, mektebimizge 96 orınlıq qosımsha oqıw imaratı hám sport zalı qurılıp, paydalanıwǵa tapsırıldı. Endi oqıwshılarımız keń hám jaqtı klasslarda oqıp bilim aladı. Bunıń ushın elimiz basshılarına úlken raxmet aytaman.

Adilbay Orazov,
Qaraqalpaqstan xabar agentligi sholıwshısı