Qaraqalpaqstan awıl xojalıǵı hám agrotexnologiyalar institutında Qıtaydıń DAYU IRRIGATION GROUP Co, LTD. kompaniyasınıń jetekshi biznes menedjeri Dr. Young hám kompaniya prezidentiniń másláhátshisi Dr. Muhammad Wahbalar, Xalıqaralıq Araldı qutqarıw fondınıń IFAS agentligi baslıǵı dr. V.Sokolov miymanda bolıp, Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev hám institut rektorı B.Jollıbekovlar menen sóylesiwler alıp barıldı.

Ushırasıwda R.Saparbaev Qaraqalpaqstan Respublikasında investorlarǵa jaratılǵan imkaniyatlar haqqında maǵlıwmat berdi.
Institutta ámelge asırılıp atırǵan joybarlar boyınsha da maǵlıwmatlar berilip, miymanlar instituttıń tájiriybe xojalıǵı menen tanıstı.
Ushırasıwda Muhammad Wahbalar ilimpazlar IFAS kompaniyasınıń qayta tayarlaw orayında birge islesiwge tayar ekenligin bildirdi. Dr. Young IFAS kompaniyası imkaniyatları haqqında prezentaciya isledi. Bul kompaniyada 1000 nan aslam xızmetkerler jumıs islewi menen birgelikte, tiykarǵı baǵdarı suwdı únemlewshi texnologiyalardı engiziw hám nátiyjeli basqarıw bolıp tabıladı. Házirgi kúnge shekem Hindstan, Pakistan, Malayziya, Kazaqstan hám Afrikadaǵı bir neshe mámleketlerde joybarlardı ámelge asırǵan bolıp, Dayu kompaniyası Qaraqalpaqstanda da óz joybarın ámelge asırıwdı belgilegen.
Bunday joybarlar arqalı keyingi basqıshta fermer xojalıqları menen birge islesiw rejelestirilgen.
Mısal retinde, Dayu kompaniyasınıń joybarlarında ortasha 3300 ga. maydanda suw resursların basqarıwǵa tek ǵana 12 adam qatnasıwı joybarlardıń nátiyjeli ekenligin kórsetedi. Respublikamızda bunday suwdı únemlewshi texnologiyalardıń engiziliwi awıl xojalıǵında suwdıń jumsalıwın azaytıw menen birge, ónimdarlıqtı arttırıwǵa múmkinshilik jaratadı.

Qaraqalpaqstan xabar agentligi.