Prezident Shavkat Mirziyoev 3-fevral kúni xalıqtıń bántligin támiyinlew hám investiciyalar tartıw boyınsha ámelge asırılıp atırǵan jumıslar boyınsha májilis ótkerdi.

Bul baǵdarda dekabr hám yanvar aylarında ótken májilislerinde úlken wazıypalar belgilengen edi. Mámleketimiz basshısı «2025-jıl bántlikti támiyinlew hám kámbaǵallıqtı azaytıwda eń áhmiyetli hám sheshiwshi jıl boladı» dep atap ótti.
Atap aytqanda, bıyılǵı jılı 5 million 200 mıń xalıqtı bánt etip, 1,5 million adamdı kámbaǵallıqtan shıǵarıw, 42 milliard dollar sırt el investiciyasın tartıp, eksporttı 30 milliard dollardan arttırıw rejelestirilgen.
Májiliste bul baǵdarda baslanǵan jumıslar hám dáslepki nátiyjeler haqqında málimleme berildi.
Yanvar ayında 277 mıń puqara jumıslı bolǵan. Sonnan 91 mıńı turaqlı jumısqa jaylasqan, 153 mıńı isbilermenlikke tartılǵan.
Kámbaǵallıqtı qsıqartıw boyınsha 32 baǵdarda jańa processsler engizilmekte. Jaqında ministrlik hám hákimliklerdegi qánigelerden ibarat toparlar Qıtayǵa barıp, tájiriybe almasıp keldi. Endi orınlardaǵı imkaniyatlar xalıqqa túsindirilip, dáramat tabıwǵa járdem beriledi.
Jumıs orınları hám investiciya óz-ara baylanıslı. Bıyıl derlik 14 milliard dollarlıq 8 mıń joybardı ámelge asırıp, 272 mıń turaqlı jumıs ornın jaratıw rejelestirilgen.
Dáslepki esap-sanaqlarǵa bola, ótken ayda elimizge 3 milliard dollar sırt el investiciyası kelgen. Fevral ayında da sonsha investiciya alıp keliw, 623 joybardı iske túsiriw názerde tutılǵan.
Májiliste joybarlar boyınsha mánzilli islesip, pátti keskin arttırıw zárúr ekenligi atap ótildi.
Jıl basınan berli eksporttıń kólemi 1 milliard 300 million dollarǵa jetken. Juwapkerlerge sırt elli birge islesiwshiler menen islesip, isbilermenlerge sırtqı bazarlarǵa shıǵıwǵa járdem beriw, jańa kárxanalardı eksportqa tartıw boyınsha tapsırmalar berildi.

ÓzA