Nókis garnizonındaǵı Ruwxıylıq hám aǵartıwshılıq orayında “Watansúyiwshilik milliy qádiriyatlarımızdıń bekkem tiregi” atamasında ruwxıy-aǵartıwshılıq ilaj ótkerildi.

Onda Ózbekstan Respublikası Mádeniy miyraslar agentligi direktorınıń birinshi orınbasarı, akademik Tursunali Kuziev, Qaraqalpaqstan Respublikası tariyxı hám mádeniyatı mámleketlik muzeyiniń direktorı, Joqarǵı Keńes deputatı Ayjamal Yusupova, Mádeniy miyraslar basqarması kórkem ekspertiza bóliminiń baslıǵı Serikbay Baybosinovlar shıǵıp sóylep, Watan tınıshlıǵı hám ǵárezsizligi, rawajlanıwı jolında xızmet etken ata-babalarımız tárepinen qaldırılǵan bay ruwxıy miyraslar haqqında maǵlıwmatlar berildi.
Elimizdegi mádeniy-miyras obyektleri hám olardıń tariyxı haqqında da keńnen maǵlıwmatlar berilip, watansúyiwshiliktiń mánisin tereń ańǵarıw zárúr ekenligi atap ótildi.
Atap ótilgenindey, Rim filosofı, jazıwshı hám mámleketlik ǵayratker Seneka “Watandı ullılıǵı, úlkenligi ushın súymeydi, onı óziniń Watanı bolǵanlıǵı ushın súyedi” dep jazıp ketken. Haqıyqatında da, atap ótilgen bul sózlerdiń negizinde tereń máni bar. Watan ullı, insannıń kindik qanı tamǵan muqaddes mákan, ana topıraq. Insan tuwılıp ósken jerinen hesh qashan waz keshpeydi, onı basqa jurtqa almastırmaydı. Watanına bolǵan ullı muhabbat insandı joqarı mártlikke jeteleydi. Doro II áskerlerine qarsı gúresip, xalıq qaharmanına aynalǵan Shıraq ańızı biykarǵa jaratılmaǵan, álbette. Sak hám massagetler malikası Tumaristiń qaharmanlıǵı neshe ásirler dawamında umıtılmadı. “Yamasa Watan, yamasa dańqlı ólim”, dep mongollarǵa qarsı urısta Watan bayraǵın qolında bekkem tutıp, jan bergen Najmiddin Kubranıń mártligi, elge muhabbatınan dárek beredi. Tariyx betlerinen taǵı qanshadan-qansha ullı babalarımızdıń Watannıń azatlıǵı, tınıshlıǵı jolındaǵı dańqlı xızmetlerin mısal retinde keltiriwimiz múmkin.
Ilaj qızǵın sáwbetlesiw, soraw-juwaplarǵa bay ótti. Mámleketimizdiń rawajlanıwına úlken úles qosıp atırǵan ǵayratkerler menen ótkerilgen mazmunlı sáwbetlesiw, jas áskerlerde úlken tásir qaldırdı.
Ilaj sońında miymanlar Arqa-Batıs áskeriy okrugi tariyxın ózinde sáwlelendirgen muzeyge sayaxat etti.

Qaraqalpaqstan xabar agentligi