Prezidentimizdiń arnawlı qararı tiykarında nawqaslarǵa «Tez járdem» xızmetin kórsetiwdiń sapasın jaqsılaw, qıstawlı medicinalıq járdem kórsetiwdi jetilistiriw maqsetinde, búgin Respublikamızǵa 8 jańa «tez járdem» avtomobilleri alıp kelinip, Nókis qalası hám rayonlıq medicina birlespelerine saltanatlı jaǵdayda tapsırıldı.

Ilajda Qaraqapaqstan Respublikası Joqarǵı Keńesiniń komitet basıǵı M.Atamuratov shıǵıp sóylep, sońǵı jılları elimizde Prezidentimizdiń arnawlı qararları tiykarında medicina tarawın rawajlandırıw, emlew-profilikatika mákemleriniń materiallıq-texnikalıq bazasın bekkemlew, olardı jetik qánigeler menen támiyinlew boyınsha alıp barılıp atırǵan jumıslardı maqtanısh penen atap ótti hám respublikamızǵa alıp kelinip atırǵan bul avtomobiller joqarıda aytıp ótken sózimizdiń ayqın dáliyli ekenligine toqtap ótti.
Sonı aytıp ótiwimiz kerek, sońǵı jılları Prezidentimizdiń qararı tiykarında, respublikamızda xalqımızǵa tez hám sapalı medicinalıq xızmet kórsetiw maqsetinde, «Tez járdem» avtomashinaları basqıshpa-basqısh jańa transportlarǵa almastırılmaqta.Atap aytqanda, búgingi kúnge shekem respublikamızǵa 90 ǵa shamalas «Volkswagen Caddy» markalı arnawlı tez járdem avtomashinaları alıp kelinip, olar xalqımız iygiligi jolında xızmet etpekte.
Avtomashinalardı tapsırıw máresimine Qaraqalpaqstan Respublikası Ministrler Keńesi Baslıǵınıń orınbasarı B. Utemuratov qatnastı.

Qaraqalpaqstan xabar agentligi