Mámleketimiz basshısı tárepinen 2024-jıl 16-dekabr kúni ótkerilgen videoselektor májilisinde máhállelerde isbilermenlik ortalıǵın jaqsılaw, kámbaǵallıqtı qısqartıw hám kommerciyalıq banklerdiń rolin arttırıw boyınsha belgilep berilgen wazıypalardıń orınlanıwın támiyinlew maqsetinde Ámiwdárya rayonında «Joybarlar yarmarkası» ilajı shólkemlestirildi.
Ilajda rayon hákiminiń orınbasarı, shólkemlerdiń basshıları, kommerciyalıq banklerdiń juwapkerleri, máhállelerdegi isbilermenlik penen shuǵıllanıwdı qáleytuǵın puqaralar qatnastı.

Yarmarkanı rayon hákiminiń birinshi orınbasarı Faxriddin Yusupov ashıp, búgingi kúnde isbilermenler ushın jaratılıp atırǵan keń imkaniyatlar haqqında aytıp, kishi biznesti hár tárepleme rawajlandırıw jolında ámelge asırılıp atırǵan reformalarǵa tolıq toqtap ótti.
Ótken 6 jılda shańaraqlıq isbilermenlik baǵdarlaması sheńberinde kreditin waqtında qaytarıp, dáramatlı bizneske iye bolǵan isbilermenlerge «Kishi biznesti qollap-quwatlaw» baǵdarlaması sheńberinde shártsiz 300 million sum kredit beriledi. Bul arqalı kelesi jıllarda kóp sanlı xalıqtıń bántligin támiyinlew názerde tutılmaqta.
Sonday-aq, 30 rayonda balıqshılıq, qoyanshılıq, sharwashılıq hám pal hárreshilik boyınsha kooperaciyalardı kóbeytiw maqsetlerine 500 million sum qaratılıwı belgilendi. Endigiden bılay da investiciya alıp keletuǵın hám kóp jumıs ornı jaratatuǵın startap joybarların qollap-quwatlaw keńeytiledi.
Sonıń menen birge sharayatı awır bolǵan 71 rayonǵa basqa aymaqlardan isbilermenlerdi mirát etiw ushın olarǵa qosımsha kreditler ajıratılıp, bıyılǵı jılı mıń awır máhálle infrastrukturasına 3 trillion 200 milliard sum ajıratılıwı belgilengen.
Endigiden bılay, «Joybarlar yarmarkası» hár bir rayon hám qalalarda ayında eki márte shólkemlestiriledi. Rayon hám qala hákimlikleriniń baslaması menen joybarlar yarmarkası ótkeriletuǵın orın tańlap alınıp, yarmarka ótkeriletuǵın sánede úsh jumıs kúni aldın máhálle uyımı hám sociallıq tarmaqlardaǵı máhállege tiyisli toparlarda daǵaza jaylastırıladı. Hákim járdemshileri hám máhálle bankleri máhállelerden jańa joybar islemekshi bolǵan, kreditke uqıplı qarıydarlardı joybarlar yarmarkasına alıp barıwı kórsetilip ótilgen.
Mine, usı wazıypalardıń orınlanıwın támiyinlew maqsetinde ótkerilgen yarmarkada rayondaǵı awıl hám máhállelerge biriktirilgen bankler baǵdarlamalar sheńberinde óz qarjıları esabınan kredit ónimleri boyınsha kórgizbeli materialların tayarlap, belsene qatnasadı. Biriktirilgen bankler kelgen fizikalıq hám yuridikalıq táreplerdiń biznes rejelerin kórip shıǵıp, olardıń talaplarınan kelip shıqqan halda kredit qarjıların ajıratıp barıwdı óz moynına aladı.
Ámiwdárya rayonı Mádeniyat bólimi imaratında ótkerilgen dáslepki yarmarkada máhállelerge biriktirilgen kommerciyalıq banklerdiń wákilleri, hákim járdemshileri hám isbilermenler qatnastı. «Joybarlar yarmarkası» ilajı sheńberinde xalıqtı isbilermenlik jumısına keńnen tartıw boyınsha islep shıǵılǵan biznes rejeler tanıstırıldı. Yarmarka sheńberinde bir qatar intakerlerdiń joybarları kommerciyalıq bankler tárepinen maqullandı hám kredit ajıratqan halda qarjılandırıw ushın tańlap alındı, – dep málimleme beredi Ámiwdárya rayonı hákimliginiń Málimleme xızmetiniń basshısı Charos Arslonova.

Qaraqalpaqstan xabar agentligi