Prezident Shavkat Mirziyoev usı jıldıń 20-yanvar kúni Esap palatası tárepinen 2024-jılı ámelge asırılǵan jumıslar hám 2025-jılǵı tiykarǵı wazıypalarǵa baylanıslı prezentaciya menen tanıstı.

Qárejetlerdiń maqsetli jumsalıwı hám baǵdarlamalardıń nátiyjeliliginde qarjı qadaǵalawı áhmiyetli. Keyingi jıllarda Esap palatasınıń jumıs usılı ózgertilip, aymaqlarda byudjet intizamına járdem beretuǵın birge islesetuǵın uyımǵa aylandırıldı. Aldıńǵı tekseriw sistemasınıń ornına xalıqaralıq standartlar tiykarında audit sisteması engizildi. Jáhán bankiniń «Sırtqı audit indikatorı»nda Ózbekstan «jaqsı» dárejege kóterildi.
2024-jıl 10-iyulde Ózbekstan Prezidentiniń «Byudjet qarjılarınan paydalanıw ústinen qarjı qadaǵalawın kúsheytiw boyınsha qosımsha ilajlar haqqında»ǵı pármanı qabıl etildi. Oǵan ministrlikler menen mámleketlik uyımlarda ishki audit sistemasın jetilistiriw, sistemanı sanlastırıw, konsolidaciyalasqan byudjet orınlanıwın sırtqı auditten ótkeriw sıyaqlı wazıypalar belgilendi.
Sanlı transformaciya procesi ámelge asırılmaqta. «Aralıq audit» avtomatlastırılǵan málimleme sisteması engizilip, oǵan 34 ministrlik hám uyım baylanıstırıldı.
2024-jılı Esap palatası jańa dereklerdiń esabınan 3,7 trillion sum byudjetke qosımsha túsimlerdi támiyinledi. Ministrlik hám uyımlardıń 9,2 trillion sumlıq nátiyjesiz qárejetleri optimallastırıldı, 2,3 trillion sumlıq qarjılay kemshiliklerdiń aldı alındı. Mámleketlik satıp alıwlarǵa baylanıslı 4,5 trillion sumlıq kemshilikler saplastırıldı.
Bunday ámelge asırılıp atırǵanı sistemalı jumıslardı bıyıl da izbe-iz dawam ettiriw zárúr.
Sonıń ishinde, «Aralıq audit» avtomatlastırılǵan málimleme sistemasına 110 ministrlik hám uyımnıń maǵlıwmatlar bazası integraciyalanadı. Bul arqalı bıyıl 480 trillion sumlıq byudjet qárejetleri monitoringi tolıq qamtıp alınadı.
Byudjetke qosımsha dáramat dereklerin anıqlaw, qarjılay hám basqa da qáwiplerdiń aldın alıw turaqlı wazıypa bolıp tabıladı. Mámlekettiń úlesi bar kárxanalardıń qarjı jumısın turaqlı monitoring etip barıw da áhmiyetli.
Bıyıl byudjetke 309 trillion sum dáramatlar túsiwin támiyinlew ilajları kóriledi. Xalıqaralıq qarjı institutlarınıń qárejetleri esabınan ámelge asırılıp atırǵan joybarlardı xalıqaralıq standartlar tiykarında auditten ótkeriw ámeliyatı baslanadı.
Prezident barlıq mámleketlik uyımlarda qarjı intizamı hám únemlilikke qatań ámel etiliwi zárúrligin atap ótti.

ÓzA