Úlkemizden jetisip shıqqan ullı ilimpazlardıń ilimiy izlenisleri hám oylap tabıwları, aǵartıwshılıq-ilimiy miyrası dúnya ilimpazları tárepinen bárqulla joqarı dárejede tán alınǵan.

Ózbekstandaǵı Islam civilizaciyası orayı baspasóz xızmetine bola, dúnyanıń jetekshi málimleme platformalarınan biri – CNN Ózbekstannıń ullı ilimpazları haqqında bir qatar maqalalar basıp shıǵardı. Onda Axmet al-Ferǵaniy, Muhammed al-Xorezmiy, Ábiw Rayxan Beruniy hám Ibn Sina sıyaqlı ilimpazlardıń ózbek milletine tiyisli bolǵanı ayrıqsha atap ótilgen.
Algebra pániniń tiykarın salıwshısı sıpatında atap ótilgen Al-Xorezmiy haqqında pikir bildirip, onıń «Al-kitob al-muxtasar fi hisob va al-muqobala» shıǵarması matematikanıń rawajlanıwına qosqan úlesi ayrıqsha atap ótiledi. «Hár saparı smartfon yamasa kompyuterden paydalanǵanımızda Muhammed ibn Muso al-Xorezmiydiń ilimiy miyrasına dus kelemiz», delinedi maqalada.
Basılımnıń atap ótiwinshe, toǵızınshı ásirdiń belgili ózbek ilimpazı Al-Ferǵanıy islamnıń ilim rawajlanǵan Altın dáwirine úlken úles qosqan. Ol astronomiya, matematika hám geografiya pánlerinde jetik qánige bolıp, hám ilim tariyxında, hám islam civilizaciyasında óz ornın bekkemlegen.
Ábiw Rayxan Beruniydi táriyplep, CNN onı dúnyanı ólshegen adam sıpatında atap ótedi. Erisken jetiskenlikleri menen kóplegen zamanagóy ilimlerge tiykar salǵan ullı ilimpaz sıpatında tán aladı. Onıń Jerdiń aylanıwı haqqındaǵı gipotezasınan baslap Jer diametrin ólshewge shekemgi shıǵarmaları antikalıq dáwir miyrası hám keleshektegi jańalıqlar, sonıń ishinde, keyin ala Oyanıw dáwirindegi Evropada payda bolatuǵın innovaciyalar arasında kópir bolǵanı atap ótiledi.
Ábiw Áliy ibn Sina, medicinanıń atası sıpatında tanılǵan, «Tib qonunlari» shıǵarması menen belgili bolıp, ol kóp ásirler dawamında Evropada hám Shıǵısta medicianıń tiykarǵı qollanbası bolıp xızmet etken. Sonday-aq, ol filosofiya tarawında da shıǵarmalar jazǵan.
Bul ilimpazlardıń ilimiy miyrası házirgi kúnde de óz áhmiyetin joyıtpaǵan bolıp, olardıń shıǵarmaları dúnya iliminiń rawajlanıwı jolında xızmet etpekte.
Sonday-aq, usı aydıń sońında CNN belgili astronom hám matematik Mırza Ulıǵbek haqqında da maqala járiyalawı kútilmekte.

N.Usmonova, ÓzA