Qaraqalpaqstan sudlarınıń tariyxı hám búgingi kúninen derek beretuǵın, Qaraqalpaqstanda sud uyımlarınıń qáliplesiwi hám rawajlanıwınıń tiykarǵı basqıshları, biyǵárez sud hákimiyatınıń shólkemlestiriliwi, sonday-aq sud tarawında xızmet etken, házirgi waqıttaǵı sudya hám xızmetkerler haqqında sóz etiwshi «Qaraqalpaqstan Respublikası sudları: tariyx hám búgin» dep atalǵan kitap baspadan shıqtı.
Usı múnásibet penen Qaraqalpaqstan Respublikası sudında kitaptı keń jámiyetshilikke tanıstırıw maqsetinde prezentaciya ótkerildi. Oǵan tariyxshı hám huqıqtanıwshı ilimpazlar, yuristler, sud veteranları hám sudyalar, ǵalaba xabar kurallarınıń wákilleri qatnastı.
Ilajdı Qaraqalpaqstan Respublikası sudı baslıǵı K.Tarixov ashtı hám alıp bardı. Ol kitaptıń jazılıw tariyxı, maǵlıwmatlardı toplaw hám olardı jámlep bir kitap halına keltiriwge shekemgi bolǵan basqıshlar, tariyxshı ilimpazlar menen óz-ara birge tıǵız baylanısta jumıs alıp barılǵanınıń nátiyjesi barlıǵı jańa kitapta óz kórinisin tapqanlıgın atap ótti.
Atap ótilgenindey, bul kitap tiykarınan «Qaraqalpaqstan sudları tarıyxınan, Ǵárezsizlik dáwirinde Qaraqalpaqstan Respublikası sudları, Qaraqalpaqstan sudları búgingi kúnde» degen úsh bólimnen ibarat. Jasırarlıǵı joq, usı kúnge shekem Qaraqalpaqstan sudları tarıyxı haqqında birde-bir kitap baspadan shıqpadı, bul baǵdardaǵı ilimiy jumıslar da derlik joqtıń qatarında. Negizinde Qaraqalpaqstan sudlarınıń tariyxı uzaq ótmishke barıp taqaladı hám búgingi kúnge shekem óziniń bir neshe rawajlanıw basqıshlarınan ótip kelgen.
Ilajda usı kitaptı jazıwda tikkeley qatnasqan tariyxshı ilimpazlar, sud veteranları, ekspertler de shıǵıp sóylep, respublikamız sudları tariyxındaǵı birinshi tariyx hám búgindi ózinde sáwlelendirgen kitaptıń baspadan shıqqanı menen bársheni qutlıqlap, bul baǵdardaǵı dáslepki qádemlerdiń qutlı kelgenligin hám dawamlı bolıwın, bul jolda ózleriniń bar bilim hám tájiriybesin jumsap járdem beriwge tayar ekenligin bildirdi.
Ilajda Qaraqalpaqstan Respublikası hákimshilik sudınıń baslıǵı A.Nurlipesov shıǵıp sóylep, jańa kitaptı jazıwda belsendilik kórsetip, birge islesken ilimpazlar menen birge, ustaz nuraniylarǵa da minnetdarshılıq bildirdi.
Bunnan soń, bir topar tariyxshı ilimpazlarǵa, sud veteranları hám sud xızmetkerlerine minnetdarshılıq sıpatında «Qaraqalpaqstan Respublikası sudları: tariyx hám búgin» kitabı sawǵa etilip, húrmet jarlıqları tapsırıldı.

Qaraqalpaqstan xabar agentligi