Shomanay rayonlıq Medicina birlespesinde «Men donorman” atamasında qan tapsırıw qayırqomlıq akciyası ótkerildi.
Akciyaǵa rayondaǵı 18 jastan 60 jasqa shekemgi puqaralar ıqtıyarlı túrde qatnastı. Jaslar, studentler, mámleketlik xızmetkerler, kewilliler hám keń jámiyetshilik wákilleri óz qanların járdemge mútáj insanlarǵa baǵıshlap, haqıyqıy adamgershilik úlgisin kórsetti.

Atap ótilgenindey, “Men donorman” akciyası haqıyqıy insanıylıq hám mehir-muhabbattıń tımsalı, jámiyettegi óz-ara járdem hám awızbirshilik ruwxın bekkemlewge úles qosadı.
– Men rayondaǵı Xorezm kóshesinde turaman. Rayonda qan tapsırıw boyınsha ótkeriletuǵın qayırqomlıq ilajlarına óz erkim menen hár jılı qatnasıp turaman. Ózim ayrıqsha jaǵdaylar bóliminde xızmet etetuǵın bolǵanlıqtan adam ómirinde júz beriwi múmkin bolǵan ayırım ayrıqsha jaǵdaylardı jaqsı túsinemen. Meniń bergen qanım járdemge mútáj qanday da bir insanǵa paydası tiyse ózimdi baxıtlı sezemen,-deydi akciya qatnasıwshılarınıń biri.
Álbette, bul akciya adamlardıń ómirin saqlap qalıw, bir-birine járdem beriw hám adamgershilik sezimin kórsetiwge qaratılǵanı menen áhmiyetli.

Qaraqalpaqstan xabar agentligi