Shomanay rayonındaǵı Diyqanabad awıl puqaralar jıyını aymaǵında jaylasqan 10-sanlı mektep imaratı janında jasıl qaplamalı futbol maydanshası hám voleybol, basketbol maydanshaları paydalanıwǵa tapsırıldı.
Maydanshanıń ashılıw máresimine rayon hákimi A.Ametov, aymaq turǵınları hám mektep jámááti qatnastı.
Ashılıw máresiminde rayon hákimi hám basqalar shıǵıp sóylep, aymaq turǵınların bayram menen qızǵın qutlıqlap, jaqsı tileklerin bildirdi.
Ashılǵan bul obyektlerde usı kúnniń ózinde Watan qorǵawshıları kúnine baǵıshlanıp, jaslar arasında kishi futbol hám voleybol sport túrinen jarıs ótkerilip, jeńimpazlar múnásip sıylıqlandı.
Maǵlıwmat ushın atap ótetuǵın bolsaq, rayondaǵı Diyqanabad awıl puqaralar jıyını turǵınları hám mektep jámááti “Baslamalı byudjet” esabınan jasıl qaplamalı futbol maydanshası hám voleybol, basketbol maydanshaların dawısqa qoyıp, 902 million sum qarjı utıp alǵan edi. Qurılıs jumısları Nókis “Aral boyı” juwapkershiligi sheklengen jámiyeti tárepinen ámelge asırıldı.
Qaraqalpaqstan xabar agentligi