14-yanvar – Watan qorǵawshıları kúni

Óz elin jawdan qorǵaǵan, eldiń abırayın ústin qoyıp, ólimge tik baqqan sadıq insanlardıń qádiri hámiyshe ullı. Sebebi, hesh bir xızmet Watandı qorǵaw sıyaqlı shın mánide ullılıqqa iye emes. Márdana gúresiw, qaharmanlıq kórsetiw babalarımızdan biybaha turmıslıq miyras bolıp tabıladı.
Ózbekstan Respublikası Qurallı Kúshleri dúzilgeniniń 33 jıllıǵı hám 14-yanvar – Watan qorǵawshıları kúni múnásibeti menen paytaxtımızda jaylasqan sawlatlı «Xalıqlar doslıǵı» kórkem óner sarayında saltanatlı máresim shólkemlestirildi.
Ilajda mámleketlik hám jámiyetlik ǵayratkerler, áskerler, shayır hám jazıwshılar, keń jámiyetshilik wákilleri qatnastı.
Ózbekstan Respublikası Qurallı Kúshleri dúzilgeniniń 33 jıllıǵı hám Watan qorǵawshıları kúni múnásibeti menen Ózbekstan Respublikası Prezidenti, Qurallı Kúshler Joqarı Bas Sárkardası Shavkat Mirziyoevtiń bayram qutlıqlawın Ózbekstan Respublikası qorǵanıw ministri, general-mayor Shuhrat Xolmuhamedov oqıp esittirdi.
Prezidentimizdiń qutlıqlawında búgingi kúnde bárshemiz, qaysı tarawda islemeyik, Watan qorǵawshısı bolıwımız shárt ekeni ayrıqsha atap ótiledi.
Ilajdıń kórkem óner bóleginde Watanımız gimni atqarıldı.
Bunnan soń, Prezidentimizdiń baslaması menen armiya sistemasında shólkemlestirilgen «Ámir Temur jawıngerlik bayraǵı» sıylıǵınıń jeńimpazı bolǵan Qubla-batıs áskeriy arnawlı okrug áskerleri sárkardası general-mayor Farhodjan Shermatovqa saltanatlı túrde tapsırıldı.
Haqıyqatında da, xalqımızdıń basına awır, sınaqlı kúnler túskende, onıń azatlıǵın, qáwipsizligin qorǵay alatuǵın márt perzentlerimiz dushpanǵa qarsı márdana gúreskeni tariyxımız altın betlerine jazılǵan. Tumaris, Spitamen, Muqanna, Jaloladdin Manguberdi, Ámir Temur sıyaqlı sárkardalardıń ismleri neshe ásirler ótse de, xalqımızdıń qálbinde máńgi jasamaqta. Olardıń erligin dawam ettirip, elimiz tınıshlıǵına hám rawajlanıwına úles qosıp atırǵan márt jigitlerdiń isleri saltanatlı máresimde jáne bir márte ulıǵlandı.
Sonday-aq, tınısh hám abadan turmıstı, ǵárezsizligimiz hám usı jolda ayanbay xızmet etip atırǵan márt jigitlerimizdi, wazıypasın atqarıp atırǵan áskerlerdi jırlaytuǵın kórkem-muzıkalıq baǵdarlamalar qoyıldı.
– Watan qorǵawshıları kúnine baǵıshlanǵan ilajǵa kóp márte qatnasqanbız, – dedi Ózbekstan «Veteran» jawınger-veteran hám mayıplar birlespesi baslıǵınıń orınbasarı, Tashkent qalalıq keńesiniń baslıǵı, polkovnik Rustam Sultanov. – Bul retki máresimde áskerlerdiń, kórkem óner ǵayratkerleriniń elimizdi jırlaytuǵın tamashaları hár qashanǵıdan da tolqınlandırdı, – desem aljaspayman. Kóplegen baǵdarlar qatarında áskeriy taraw wákillerine mámleketimiz tárepinen qaratılıp atırǵan itibardı olardıń kózlerinen de túsiniw múmkin. Haqıyqatında da júrekke jetip baratuǵın baǵdarlamanıń gúwası boldıq. Shólkemlestiriwshilerge bul ushın minnetdarshılıq bildiremiz.
Saltanatlı máresimge Ózbekstan Respublikası Bas ministri Abdulla Aripov, Ózbekstan Respublikası Oliy Majlisi Senatınıń Baslıǵı Tanzila Norboeva, Oliy Majlis Nızamshılıq palatasınıń Spikeri Nuriddinjon Ismoilov qatnastı.

Abdulaziz RUSTAMOV,
ÓzAnıń xabarshısı