Prezident Shavkat Mirziyoev 11-yanvar kúni transport hám logistika sistemasın jáne de rawajlandırıw ilajları boyınsha prezentaciya menen tanıstı.
Keyingi jeti jılda jergilikli tasıwlardı qollap-quwatlaw nátiyjesinde júk avtomobilleriniń sanı 7 esege artıp, 26 mıńǵa jetken. Olardıń xalıqaralıq tasıwdaǵı úlesi bolsa 35 procentten 60 procentke asqan.
Biraq dúnyadaǵı geosiyasiy jaǵday bul tarawda qıyınshılıq tuwdırmaqta. Batıs jónelisinde tasıw múddeti 2 márte, qárejeti bolsa 1,5 esege shekem artıp ketpekte. Ayırım Evropa mámleketleri shegaralarındaǵı ótkeriw punktleri jabılǵan, basqalarında uzaq gezek kútiwler júzege kelgen.
Sol sebepli transport-logistika sistemasın jedel rawajlandırıw hám sırtqı sawda jónelislerin diversifikaciyalaw zárúrligi atap ótildi.
Sonday-aq, xalıqaralıq hám regionallıq bazarlarǵa alıp shıǵatuǵın alternativ jónelisler boylap jaylasqan mámleketler menen tranzit júk tasıwlardı ápiwayılastırıw hám erkinlestiriw, shegaralarda óndiriletuǵın jıyımlardı óz-ara teńlik tiykarında azaytıw yaki biykarlaw ilajların kóriw kerek.
Elimizde júk jónetiwshi hám tasıwshını óz-ara baylanıstıratuǵın ekspeditorlıq xızmetleriniń tiykarǵı bólegi sırt el kompaniyalarına tuwra keledi. Bul tarawda jergilikli ekspeditorlarımızdı qollap-quwatlaw maqsetinde olardıń xalıqaralıq júk tasıwdaǵı xızmetlerine qosımsha qun salıǵı alınbaytuǵın boldı. Nátiyjede jergilikli kárxanalardıń úlesin 45-50 procentke shıǵarıw imkaniyatı kórsetip ótildi.
Usınday ilajlar arqalı xalıqaralıq júk tasıw kólemin 2 esege arttırıw, transport xızmetleri eksportın keminde 3 milliard dollarǵa jetkeriw wazıypası belgilendi.
Ózbekstan aymaǵı arqalı tranzit tasıwlar kólemin kóbeytiw de áhmiyetli.
Ózbekstan aymaǵı arqalı tranzit tasıwlar kólemin kóbeytiw de áhmiyetli. Bul baǵdarda jaratılıp atırǵan qolaylıqlar nátiyjesinde mámleketimiz keyingi jılları Jáhán bankiniń logistika boyınsha indeksinde joqarılamaqta. Bul tranzit potencialı menen birge investiciya aǵımınıń artıwına, ulıwma, sawda-ekonomikalıq baylanıslardıń rawajlanıwına xızmet etedi.
Juwapkerlerge elektron gezek sistemasın keńnen en jaydırıw, shegaradan ótiw waqtın 20 minutqa shekem qısqartıw, transport quralların onlayn baqlaw sistemasın jolǵa qoyıw arqalı qosımsha júk aǵımların tartıw boyınsha tapsırmalar berildi.
Jáne bir másele – jónelissiz taksi xızmetlerine tiyisli. Eki jıl aldın fizikalıq táreplerge ózin-ózin bánt etken halda taksishilik etiwge waqtınshalıq ruxsat berilgen edi. Bunıń nátiyjesinde taksishiler sanı 6 esege artıp, 457 mıńǵa jetti. Sol sebepli endi bul tártip turaqlı bolatuǵını aytıldı.
Taksilerge qarıydar tabıwda málimleme xızmetleri bazarı qáliplesti. Házirgi waqıtta 151 agregator kompaniyalar jumıs alıp barmaqta hám bul jáne ósip barmaqta. Sol sebepli agregatorlardıń jumısın tártipke salıw, olardıń mámleket, aydawshı hám jolawshılar aldındaǵı minnetlemesin anıq belgilew wazıypası qoyıldı.
ÓzA