Еkologiyalıq turaqlılıqtı támiyinlewde mámleketlik hám jámiyetlik uyımlar, keń jámiyetshiliktiń wákilleri birgelikte jedel jumıs alıp barmaqta.
Tarawda jumıs islep atırǵanlardı qollap-quwatlaw hám olardıń miynetlerin múnásip xoshametlew maqsetinde «Ózbekstan Respublikasında xızmet kórsetken ekolog» húrmetli ataǵı shólkemlestiriledi. Usı maqsette islep shıǵılǵan nızam Senattıń Agrar, suw xojalıǵı máseleleri hám ekologiya komitetiniń májilisinde kórip shıǵıldı.
Bul húrmetli ataq ekologiya hám qorshaǵan ortalıqtı qorǵaw tarawın rawajlandırıw, tábiyattı qásterlep-saqlaw, biokóptúrleslikti saqlaw, klimat ózgeriwi aqıbetlerin jumsartıw, tábiyǵıy resurslardan aqılǵa uǵras paydalanıw hám olardı qayta tiklew baǵdarında salmaqlı nátiyjelerge erisken puqaralarǵa beriliwi maqset etilgen.
Еkologiyalıq jaqtan taza hám innovaciyalıq texnologiyalardı islep shıǵıw hám ámeliyatqa engiziw, jasıl aymaqlardı keńeytiw hám kóklemzarlastırıw jumıslarında ayrıqsha baslama kórsetken, xalıqtıń ekologiyalıq mádeniyatın arttırıw, jas áwladtı tábiyatqa húrmet ruwxında tárbiyalaw hám sistemada joqarı maman kadrlardı tayarlaw baǵdarında pidákerli miynet etip atırǵan qánige-xızmetkerler hám taraw wákilleri, ekobelsendilerge de bul sıylıq beriliwi názerde tutılǵan.
Májiliste «Ózbekstan Respublikasınıń ayırım nızam hújjetlerine shıǵındılardı toplaw hám alıp shıǵıw xızmetlerin kórsetiw tarawında tólem normasın bekkemlewge qaratılǵan qosımshalar menen ózgerisler kirgiziw haqqında»ǵı nızam da dodalandı.
Nızam menen Puqaralıq hám Turaq jay kodekslerine, «Báseki haqqında»ǵı hám «Еlektr energetikası haqqında»ǵı nızamlarǵa qattı turmıslıq shıǵındılardı toplaw hám alıp shıǵıw xızmetleri ushın májbúriy tólemler boyınsha qarızdarlıǵı bar bolǵan tıtınıwshılar qısqa xabar (SMS) arqalı xabardar etilgeninen keyin usı qarızdarlıq saplastırılǵanına shekem olardan elektr energiyası ushın tólemlerdi qabıl etiwdi waqtınshalıq sheklewge qaratılǵan huqıqıy normalar belgileniwin názerde tutatuǵın qosımshalar hám ózgerisler kirgizilmekte.
Mámleketlik hám jeke menshik turaq jay fondlarındaǵı jaylardıń múlk iyelerine, ijaraǵa, arendaǵa alıwshılarına kommunallıq xızmetler kórsetiw májbúriy tólemler úsh aydan aslam tólenbegen jaǵdayda toqtap turılıwınan qattı hám suyıq turmıslıq shıǵındılardı toplaw hám alıp shıǵıw xızmetleri buǵan kirmeytuǵını názerde tutılmaqta.
Bunnan tısqarı, komitet tárepinen xalıq deputatları jergilikli keńesleriniń Agrar, suw xojalıǵı hám ekologiya máseleleri boyınsha turaqlı komissiyalarınıń aǵzaları ushın oqıw seminarı ótkerildi.
Awıl xojalıǵın reformalaw hám rawajlandırıw, azıq-awqat qáwipsizligin támiyinlew, tarawda jańa jumıs orınların jaratıw, qorshaǵan ortalıqtı saqlaw, júzege kelip atırǵan mashqalalar hám olardı óz waqtında sheshiw boyınsha usınıslar islep shıǵıw sıyaqlı wazıypalar belgilep alındı.
Seminarda turaqlı komissiya aǵzaları dodalanǵan máseleler boyınsha óz pikirleri hám usınısların bildirdi.
N.Abduraimova, ÓzA