Aldın xabar bergenimizdey, respublikamızdıń barlıq rayonlarındaǵı biyday atızlarında tárbiyalaw jumısları, báhárgi egis máwsimine texnikalardı hám jerlerdi tayarlaw, jap-salmalardı tazalaw sıyaqlı ilajlar qızǵın dawam etpekte.
Qońırat rayonında da kanallardı hám ishki salmalardı betonlaw jumısları ámelge asırılmaqta,-dep xabar bermekte Suw xojalıǵı ministrliginiń baspasóz xızmeti.
Qońırat rayonındaǵı «Ayran jap» kanalında betonlaw jumısları baslandı.
– Bıyılǵı gúzgi-qısqı máwsimde kárxanamız esabındaǵı xojalıqlar aralıq kanallardı hám ishki salmalardı betonlastırıw boyınsha reje-grafikler islep shıǵılǵan,-deydi Qońırat rayonı “Suw jetkeriw xızmeti” mámleketlik shólkeminiń direktorı Sh.Djadigerov. – Keshe ǵana suwshılar tárepinen «Ayran jap» kanalında betonlaw jumısları baslandı.
Rayondaǵı ishki salmalardı betonlaw boyınsha fermer xojalıqları kesiminde de rejeler islep shıǵıldı hám jumıslar baslandı. Búgingi kúnde rayondaǵı fermer xojalıqları tárepinen 238 metrlik uzınlıqtaǵı ishki salmalar betonlandı. Bul baǵdardaǵı jumıslar nátiyjeli dawam etpekte.
Qaraqalpaqstan xabar agentligi.