Qaraqalpaqstan medicina institutında “Rektor hám jaslar” ushırasıwı bolıp ótti. Onda institut rektorı, medicina ilimleriniń doktorı, professor Oral Ataniyazova institutta oqıp atırǵan joqarı kurs student-jasları menen ushırastı.
Bul ushırasıwdıń tiykarǵı maqseti, jas áwladtı ilimge tartıw, olardıń óz ústinde izleniwlerin qollap-quwatlaw, bilim alıwda jol-joba kórsetiw hám óz tarawında kásiplik pidaylıǵın arttırıw bolıp esaplanadı.
Ushırasıw dawamında rektor tarawdaǵı jańalıqlar, elimizdiń medicina tarawındaǵı jetiskenlikler, ilim dúnyasınıń tereń sırları, óziniń basıp ótken ómir jolı, jetiskenligi hám nátiyjelerge alıp kelgen miynetleri, sonday-aq, qıyınshılıqlar hám olardı jeńip ótiw jolları haqqında tolıq maǵlıwmatlar berip ótti.
Jaslarda bul ómirlik sabaqlar úlken qızıǵıwshılıq oyatıp, olarǵa jańa ideyalar berdi. Ushırasıwda jaslar ózleriniń qızıqtırǵan sorawların berip, oǵan juwap aldı.
Ilaj sońında jaslar rektorǵa óz minnetdarshılıqların bildirdi hám olar aldaǵı rejeleri menen ortaqlastı.
Ushırasıwda, jıl dawamında oqıwda jámiyetlik jumıslarda belsene qatnasqan, xalıqaralıq olimpiadalarda sıylı orınlardı alǵan, mámleketlik stipendiatlarǵa húrmet jarlıqları tapsırıldı.
Qaraqalpaqstan xabar agentligi