Tashkent qalasındaǵı Jaslar dóretiwshilik sarayında «Tashkent – ǴMDAnıń birinshi jaslar paytaxtı – 2024» joybarınıń saltanatlı jabılıw máresimi hám Xalıqaralıq volontyorlar forumı ótkerildi.

«Jaslar forumı-2024» sheńberinde shólkemlestirilgen ilajda ǴMDA mámleketleri jetekshi volontyorları, xalıqaralıq shólkemlerdiń wákilleri hám Ózbekstan volontyorlıq mektepleriniń belsendi aǵzaları qatnastı.
Forum dawamında ǴMDA mámleketleri volontyorlıq jumısına baǵıshlanǵan kórgizbe hám Oraylıq Aziyadaǵı volontyorlıqqa tiyisli BMShtıń birinshi sholıwı kórsetildi. Jıl dawamında eń jaqsı nátiyjelerge erisken volontyorlar da múnásip atap ótildi. Sonday-aq, volontyorlar hám shólkemlestiriwshiler tárepinen jıl nátiyjeleri dodalanıp, keleshektegi birge islesiw perspektivaları belgilep alındı.
Forum juwmaǵında «Tashkent – ǴMDA jaslar paytaxtı» xalıqaralıq joybarınıń jabılıw máresimi ótkerildi hám 2025-jıl ushın bul estafeta Ázerbayjannıń Gabala qalasına tapsırıldı.

Gulnoza Boboeva, ÓzA