Ózbekstan Respublikası Prezidentiniń 2023-jıl 24-maydaǵı «Sanlı xızmetlerge qamtıp alıwdı hám sapasın arttırıw hám taraw, tarmaq hám aymaqlardı sanlı transformaciyalaw ilajları haqqında» ǵı qararında «Jaslar ushın «Bir million programmist» joybarınıń logikalıq dawamı bolǵan onlayn platformada oqıw kursların shólkemlestiriw belgilengen edi.

Bunda 2023-2024-jıllar dawamında jergilikli byudjet qarjıları esabınan onlayn oqıw platformasında professional kurslardı jolǵa qoyıw hám Prezidentimizdiń «Qaraqalpaqstan Respublikasın kompleksli social-ekonomikalıq rawajlandırıw hám xalıqtıń bántligin támiyinlewdiń qosımsha ilajları haqqında»ǵı qararı talapları tiykarında «Coursera» joybarı sheńberinde onlayn platforma arqalı oqıw kursların shólkemlestiriw jolǵa qoyılǵan.
Tashkent informaciyalıq texnologiyaları universiteti Nókis filialında sıylıqlaw máresimine arnalǵan ilaj bolıp ótti. Onda reyting tiykarında sertifikat alǵan hár bir rayon hám qaladan úsh mekteptiń informatika páni oqıtıwshısı hám joqarı oqıw orınları pedagog oqıtıwshıların jergilikli byudjet qarjıları esabınan «Málimleme kommunikaciya texnologiyaların engiziw hám sanlastırıw sektorı» nan qánige sisteması qáliplestirilgen bolıp, jámi 52 informatika páni oqıtıwshıları aqshalay sıylıqlandı.
Ilajda Qaraqalpaqstan Respublikası Joqarǵı Keńesiniń komitet baslıǵı M.Atamuratov, Qaraqalpaqstan Respublikası Ministrler Keńesi baslıǵınıń sanlastırıw boyınsha keńesgóyi M.Elmuratov, Muhammed al-Xorezmiy atındaǵı TITU Nókis filialı direktorınıń oqıw isleri boyınsha orınbasarı X.Seytkamalov hám oqıtıwshı pedagoglar qatnastı.
Sıylıqlaw máresiminde sózge shıqqanlar búgingi kúnde informaciyalıq texnologiyalarǵa bolǵan talaptıń artıp atırǵanlıǵı, IT tarawın tolıq iyelegen jaslardı jetilistirip shıǵarıw arqalı Ózbekstan hám dúnya IT bazarın jas kadrlar menen tolıqtırıwdıń áhmiyetine toqtap ótti.

Qaraqalpaqstan xabar agentligi