«Prezident shırshası» saltanatları hár jılı joqarı ruwxta bolıp ótedi. Bıyılǵı bayram aldınǵı jıllarǵa pútkilley uqsamaǵan xalıqshıl, jarqın, tásirlerge bay tárizde ótkerildi.

Usı múnásibet penen paytaxtımızdaǵı «Ózbekstan» xalıqaralıq forumlar sarayına tiykarınan sociallıq qorǵawǵa mútáj, ata-ana qaramaǵınan ayırılǵan, imkaniyatı sheklengen balalar mirát etildi.
Bul ilaj elimiz keleshegi bolǵan balalar ushın ayrıqsha itibar hám ǵamxorlıqtı bildiredi. Mámleketimiz basshısınıń qollap-quwatlawı astında alıp barılıp atırǵan sociallıq reformalar, ásirese, balalardı hár tárepleme qollap-quwatlawǵa qaratılǵan keń kólemli baǵdarlamalar onıń ayqın mısalı bolıp esaplanadı.
Bayram baǵdarlaması balalar ushın teatr tamashaları, interaktiv oyınlar, cirk artistleriniń qızıqlı shıǵıwları hám belgili estrada qosıqshılarınıń qosıqlarına bay boldı.
Mámleketimizde jetim hám ata-ana qaramaǵınan ayırılǵan balalardıń huqıqların qorǵaw, olarǵa sapalı tálim-tárbiya beriw hám sociallıq qorǵaw maqsetinde keń kólemli jumıslar ámelge asırılıp kelinbekte. Atap aytqanda, «Prezident sawǵası» sociallıq baǵdarlaması sheńberinde kewili yarım balalarǵa materiallıq hám ruwxıy járdem kórsetiwge úlken áhmiyet qaratılmaqta.
Sonıń menen birge, «Prezident sawǵası» baǵdarlaması sheńberinde de respublika boylap jámi 10 mıń 282 Mehriybanlıq hám Múriwbet úyleriniń ul-qızları, «SOS -balalar máhálleleri», Shańaraqlıq balalar úyi tárbiyalanıwshıları, ata-ana qaramaǵınan ayırılǵan balalar, elimiz tınıshlıǵı jolında qaytıs bolǵan huqıq qorǵaw uyımları xızmetkerleriniń perzentleri ushın 12 atamadaǵı oqıw quralları hám 15 atamadaǵı mazalı zatlardan ibarat bolǵan Prezident sawǵaları tayarlandı.
«Ózbekstan» xalıqaralıq ánjumanlar sarayında qosıqlar, qızıqlı oyınlar shıńına jetti. Biyǵam balalıqtı eske salıwshı bul demlerde hámmeniń kewili shadlıqqa tolǵan.
– Bıyılǵı bayramnıń ózine tán baǵdarda shólkemlestirilgeni balalarǵa unamaqta,-dedi paytaxtımızdaǵı 22-Mehriybanlıq úyi direktorınıń ruwxıy-aǵartıwshılıq isler boyınsha orınbasarı Xursanay Xolova. – Saray foyesi kóplegen múyeshlerge bólingen bolıp, olarda balalar ushın ájayıp oyınlar, viktorinlar shólkemlestirilgeni itibarǵa ılayıq.
– «Prezident shırshası» saltanatlarında qatnasıwdı hár bir bala árman etedi,-dedi Tashkent qalasındaǵı 30-Mehriybanlıq úyiniń tárbiyalanıwshısı Javohir Danilov. – Biz bul bayramda elimizdiń belgili insanları, kórkem óner sheberleri, sport juldızları menen kórisiw, olar menen sáwbetlesiwge eristik.
– Tárbiya dárgayımız úlken bir shańaraqqa uqsaydı,-dedi 30-Mehriybanlıq úyi direktorınıń ruwxıy-aǵartıwshılıq isler boyınsha orınbasarı Faniliya Gabbasova. – Balalar bul bayramǵa úlken tayarlıq kórdi, bayram kiyimlerin tayarladı. Qosıqlar úyrendi. Mámleketimizdiń balalarǵa mehir hám itibarın ul-qızlarımız tek ǵana usı ilajlarda emes, al hár kúni, hár minutta sezinbekte.
– Bunday saltanatlı ilajda balalar menen ushırasıw, sáwbetlesiw arqalı olardıń qálbine quwanısh baǵıshlawdan artıq baxıt bolmasa kerek,-dedi awır atletika boyınsha jáhán chempionı Ruslan Nuriddinov. – Balalarǵa paydamız tiygeni hám olarǵa bir dúnya shadlıq baǵıshlaǵanımızdan oǵada quwanıshlımız.
Sawlatlı saraydıń zalında júzlegen túrdegi shıraqlar jarqıraydı. «Ayaz baba» teatrlastırılǵan ertegi zamanagóy kóriniste kórsetildi. Bul muzıkalı tamasha balalardı qıyınshılıqlardı múnásip túrde jeńip ótiw, sportta belsendi bolıwǵa shaqırıwı menen kishkenelerge oǵada unadı.
Ilaj sońında «Insan» orayları arqalı balalarǵa sawǵalar tarqatılıp, olarǵa bayram keypiyatın baǵıshladı. Bunday bayram tamashaları mámleketimiz boylap dawam etpekte. Olar medicinalıq, sociallıq jaǵdayına qaramastan barlıq balalarǵa bir dúnya quwanısh baǵıshlamaqta.

Nazokat USMONOVA,
ÓzAnıń xabarshısı