Egislik maydanlarda gúzgi shúdigarlaw jumısların shólkemlestiriw, mol zúráátke tiykar jaratadı. Sonlıqtan da, házirgi waqıtta awıl xojalıǵı eginleri ushın belgilengen atızlardı shúdigarlaw jumısları qızǵın dawam etpekte.
Mámleketimizdiń suwǵarılatuǵın maydanlarında awıl xojalıǵı eginlerinen az shıǵın menen, mol hám sapalı zúráát jetistiriwde topıraqqa tiykarınan topıraqtı qayta islew, yaǵnıy gúzgi shúdigarlaw úlken áhmiyetke iye. Jerlerdi sapalı shúdigarlawǵa tayarlaw ushın traktor hám pluglar aldınnan jumısqa tayar halatqa keltiriliwi hám sazlanıwı, al atızlar súrimge tayar bolıwı zárúr.
Bul agrotexnikalıq ilaj tek ǵana gúz máwsiminde ámelge asırıladı. Gúzgi shudigarlawdı sapalı ótkeriw ushın birinshi gezekte atızlar ǵawasha hám basqa ósimlik qaldıqlarınan tazalanıwı, suwǵarıw salmalarınıń tegisleniwi, topıraqqa zárúr muǵdarda jergilikli hám mineral tóginler tógiliwi maqsetke muwapıq bolıp tabıladı. Shorı juwılmaǵan maydanlarǵa mineral tóginler shúdigardan aldın qollanılmaydı.
– Awıl xojalıǵında eginlerden joqarı hám sapalı ónim alıw eń aldı menen egilgen maydannıń ónimdarlıǵına baylanıslı. Buǵan baylanıslı eń zárúrli agrotexnikalıq ilajlardan biri tiykarınan topıraqtı qayta islew, yaǵnıy shúdigarlaw esaplanadı,-deydi Awıl xojalıǵı ministriniń birinshi orınbasarı A.Koziev.
Shúdigarlaw topıraqtıń barlıq qásiyetlerine: agrofizikalıq, agroximiyalıq, biologiyalıq ózgesheliklerine unamlı tásir etetuǵın process bolıp, bul waqtında hám sapalı ámelge asırılsa topıraqtıń kólem massası, hawa almasıwı, mikrobiologiyalıq processleri sezilerli dárejede jaqsılanadı.
Shúdigarlaw jumısların sapalı shólkemlestiriw maqsetinde bıyılǵı jılı Qaraqalpaqstan Respublikasında 2025-jıldıń ónimi ushın 85 mıń gektar jer maydanlarda gúzgi shúdigarlaw jumısların alıp barıw rejelestirilip, olarǵa 138 otryad biriktirildi.
Usı otryadlarǵa 608 joqarı ónimli súrim traktorları berilip, bul jumıslar búgingi kúnge kelip, 72 mıń gektar egislik maydanlarda ámelge asırıldı. Óz gezeginde bul jumıslardı tolıq orınlaw maqsetinde egislik maydanlarda shúdigarlaw jumısları dawam etpekte.
Á.Jiyemuratov,
Qaraqalpaqstan xabar agentligi