Usı jıl 22-25-dekabr kúnleri Qazaqstannıń Aqtaw qalasında «Made in Uzbekistan» yarmarkası bolıp ótpekte.
Ilaj mámleketimizdiń eksport potencialın kórsetiw, xalıqtı arzan hám sapalı ónimler menen támiyinlew, sonday-aq, Ózbekstan hám Qazaqstan isbilermenleri arasında jańa isbilermenlik baylanısların ornatıwǵa járdemlesiw maqsetinde shólkemlestirildi.
Tórt kún dawamında yarmarkada Qaraqalpaqstan Respublikası, Xorezm, Samarqand, Ándijan, Tashkent wálayatları hám Tashkent qalasınan 50 den aslam kárxanalardıń ónimleri kórsetiledi. Miymanlar azıq-awqat, toqımashılıq, ónermentshilik, bılǵarı, elektrotexnika hám qurılıs sanaatınıń joqarı sapalı ónimlerin satıp alıw imkaniyatına iye boladı.
― Sońǵı jıllarda qońsılas Qazaqstan Respublikası menen birge islesiw jaqsı jolǵa qoyılıp, sawda qatnasıqları bekkemlenip, birge islesiwshi shólkemler menen birgelikte orınlarda kórgizbeler, ushırasıwlar hám kóshpeli seminarlar shólkemlestirip, bul óziniń unamlı nátiyjelerin berip atırǵanlıǵınıń gúwası bolıp atırmız,-deydi Sawda-sanaat palatası Qaraqalpaqstan Respublikası basqarmasınıń baslıǵı K.Artıkov. – Bul nárse isbilermenler, fermerler hám xalıqaralıq birge islesiwshiler arasında baylanıslardı bekkemlewge túrtki bermekte.
Ilaj dawamında eki tárepleme sóylesiwler alıp barılıp, birge islesiwlerdi ele de keńeytiw baǵdarında kelisimler dúzilmekte.
Álbette, «Made in Uzbekistan» yarmarkası milliy ónimlerdi ǵalaba en jaydırıw, básekige shıdamlılıǵın kórsetiw, qazaqstanlı birge islesiwshiler menen sawda-ekonomikalıq birge islesiwdi jáne de bekkemlewge xızmet etedi.
Á.Jiyemuratov,
Qaraqalpaqstan xabar agentligi