Qaraqalpaq sportı tariyxında elimiz bayraǵınıń bálentlerge kóteriliwinde kóplegen sportshılardıń tutqan ornı bar. «Ustazı jaqsınıń ustamı jaqsı» degenindey, sportshılardıń jaqsı nátiyjelerdi qolǵa kirgiziwinde álbette, ustaz—trenerlerdiń miynetleri salmaqlı. Paytaxtımız Nókis qalasında Qaraqalpaqstan Respublikası sport ministrligi tárepinen sport tarawın rawajlandırıw hám jaslardı watansúyiwshilik ruwxında tárbiyalawǵa úles qosqan veteran sportshılarımızdı sıylıqlaw máresimi bolıp ótti.
«Jaslar hám biznesti qollap quwatlaw» jılında ámelge asırılǵan salmaqlı jumıslar, ustaz-trenerlerdiń shákirt tayarlawda tutqan ornı, sonday-aq, jańa jıl qarsańında dasturxan dógereginde sáwbetlesiw túrinde ótkerilgen ilajda shıǵıp sóylewshiler Prezidentimiz tárepinen sport tarawına qaratılıp atırǵan imkaniyatlar, tarawdaǵı jaqsı nátiyjeler, jaslarımızdı sportqa tartıw hám olardı qollap-quwatlaw sonday-aq, ustaz-shákirt sistemasın jáne de jetilistiriw boyınsha pikirlerin bildirdi. Ilajda Qaraqalpaqstan Respublikası sport ministri A. Allanazarov qatnasıp, veteran ustazlarǵa minnetdarshılıǵın bildirdi.
Qaraqalpaqstan xabar agentligi