Usı jıldıń 10-dekabr kúni Qaraqalpaqstan kórkem óner sarayında “Yosh” estradalıq joybarınıń ekinshi máwsimine qatnasıwshılardı taӊlap alıw ushın kasting bolıp ótti.
Qaraqalpaqstan Respublikası Mádeniyat ministrligi tárepinen respublikamızdaǵı 16 jastan 30 jasqa shekemgi barlıq talantlı jaslardı qollap-quwatlaw maqsetinde shólkemlestirilgen joybarda qatnasıw ushın 182 qatnasıwshı dizimnen ótti.
Usı kúnniӊ ózinde barlıq qatnasıwshılar arnawlı tóreshiler quramı tárepinen baqlanıp, bahalanıp barıldı.
-Talantımdı sınnan ótkeriw hám Mádeniyat ministrligi tárepinen shólkemlestirilip atırǵan joybardıӊ ekinshi máwsimi qatnasıwshıları qatarınan orın alıw, sonday-aq, ustazlardan ele de úyreniw, doslar arttırıw arqalı dóretiwshiligimdi rawajlandırıwdı maqset etkenmen, -deydi jas talant iyesi Azizbek Nuratdinov.
Ekinshi máwimniń dáslepki turına kelesi jıldıń yanvar ayında start beriledi. Onda kastingten tabıslı ótken 20 jas óz-ara bellesip baradı. Joybar jeӊimpazlarına shólkemlestiriwshiler tárepinen aqshalay sıylıq hám basqa da jeӊillikler beriledi. Yaǵnıy, olarǵa dóretiwshilik etiwine qolaylı sharayatlar jaratıp beriliwi menen birge, belgili qosıqshılarımız benen bir saxnada qosıq atqarıw imkaniyatına iye boladı.
Joybar Qaraqalpaqstanda jaӊa talant iyelerin qollap-quwatlawǵa hám elimizde milliy estrada kórkem óneriniń rawajlanıwına xızmet etedi.
Qaraqalpaqstan xabar agentligi.