2024-jıldıń ótken 11 ayı dawamında Mámleketlik kadastrlar palatası Qaraqalpaqstan Respublikası basqarması hám onıń aymaqlıq filialları tárepinen 45 mıń 407 turaq jayǵa hám 2800 turaq jay emes obyektlerge múlk huqıqın beriwshi kadastr pasportı tayarlap berilgen. Qosımsha etiliwinshe, 11 ay dawamında Qaraqalpaqstandaǵı 54 mıń 353 turaq jayǵa bolǵan huqıqlar mámleketlik dizimnen ótkerilgen.
2024-jıl – Mámleketlik kadastrlar palatasında «Arxiv hújjetlerin tártip boyınsha sanlastırıw hám olardıń esabın durıs júrgiziwdi jolǵa qoyıw jılı», dep járiyalanıwı múnásibeti menen búgingi kúnde respublikamız boyınsha saqlawda turǵan jámi 462 mıń 812 kadastr hújjetlerinen 110 mıńnan aslamı jańa tártip boyınsha sanlastırılıp, tártipke salınbaqta.
– Kadastr hújjetlerin zıyansız qayta xatlawdan ótkeriw hám tártiplestiriw jumısları Ámiwdarya, Taxtakópir, Qaraózek, Bozataw hám Shomanay rayonlarında juwmaqlandı,-deydi Mámleketlik kadastrlar palatası Qaraqalpaqstan Respublikası basqarmasınıń baslıǵı S.Urunbaev.
Úlgi sıpatında tanlap alınǵan Ámiwdárya rayonı filialı arxivi kerekli zamanagóy mobil stellajlar, sensor datchikler, temir esik hám basqa da zárúrli texnikalar menen úskenelendi.
Sonday-aq, Nókis qalası filialına da zamanagóy mobil stellajlar ornatıldı. Bul stellajlar hújjetlerdi zıyansız saqlap, olardı saqlawdı kóbeytiwge, orınların ápiwayı stellajlarǵa salıstırǵanda bir qansha únemlewge múmkinshilik beredi.
11 ay ishinde isbilermenlik hám qala qurılısı jumısların ámelge asırıw ushın jer uchastkaların múlk huqıqı hám ijara huqıqı tiykarında elektron onlayn-aukcion arqalı beriw boyınsha, jámi 6837 jer uchastkacı baǵdarlamaǵa kirgizilgen.
Sonnan, 2348 jer maydanı 102,27 gektarlıq jer uchastkası “E-auksion” sawda maydanshasında satıwǵa qoyılıp, 257 jer uchastkası realizaciyalandı. 1892 si tiyisli shólkemler tárepinen biykar etilgen, 2340 ı komissiya tárepinen kórip shıǵılmaqta, al 189 zı jeńimpaz retinde dizimge alınǵan.
Jeke tártipte turaq jay qurıw hám turaq jayın abadanlastırıw ushın jer uchastkaların múlk huqıqı tiykarında elektron onlayn-aukcion arqalı realizaciyalaw boyınsha, jámi 4222 jer uchastkası baǵdarlamaǵa kirgizilgen.
Sonnan, 1634 i aukcionda satıwǵa shıǵarılǵan, 949 jer uchastkası “E-auksion” da realizaciyalanǵan.
Á.Jiyemuratov,
Qaraqalpaqstan xabar agentligi