Tashkentte Ózbekstan hám BMSh Balalar qorı (YuNISEF) menen birge islesiwdiń 30 jıllıǵına baǵıshlanǵan saltanatlı ilaj bolıp ótti.
Ilajda qatnasqan Senat Baslıǵı Tanzila Norboeva ósip baratırǵan áwlad mápleri jolında óz-ara birgeliktegi jumıslardı dawam ettiriw áhmiyetli ekenligin atap ótti.
Balalardıń turmıs dárejesin jaqsılaw, bilimlendiriw hám medicina xızmetinen paydalanıw imkaniyatların arttırıw, sonday-aq, olardı zorlıq hám kemsitiwdiń barlıq túrlerinen qorǵawǵa qaratılǵan kóplegen joybarlar ámelge asırıldı.
YuNISEF kompleksli baǵdarlamalardı ámelge asırıw ushın texnikalıq járdem hám resurslar kórsetiw arqalı Ózbekstannıń balalar ushın qolaylı ortalıq jaratıw boyınsha baslamaların qollap-quwatlawda áhmiyetli rol atqaradı. Bul birge islesiw mámleketimizde balalar huqıqları tarawında xalıqaralıq standartlardı alǵa qoyıw, sonıń ishinle, BMShtıń Bala huqıqları haqqındaǵı konvenciyasın turmısta qollanıw ushın áhmiyetli faktor boldı.
Ózbekstanda kóp jıllardan berli jas áwladtıń kamal tabıwı ushın qolaylı sharayatlar jaratıw boyınsha sistemalı jumıslar alıp barılmaqta. Sońǵı jılları mámleketimizde Prezident Shavkat Mirziyoevtiń basshılıǵında balalardıń huqıqları menen máplerin támiyinlewge qaratılǵan keń kólemli jumıslar ámelge asırıldı.
Balalardıń huqıqları menen máplerin támiyinlewdiń huqıqıy hám institucionallıq tiykarları izbe-iz rawajlandırılmaqta. Jas áwladtı qorǵaw, olardıń abadanlıǵın támiyinlew hám bárkamal rawajlanıwı ushın sharayatlar jaratıwǵa qaratılǵan bir qatar áhmiyetli nızamlar hám normativlik-huqıqıy hújjetler qabıl etildi.
2024-jıldıń noyabr ayında mámleketimiz basshısı «Balalardı zorlıqtıń barlıq túrlerinen qorǵaw haqqında» ǵı nazamǵa qol qoydı. Bul balalar huqıqların qorǵaw milliy sistemasın bekkemlewde áhmiyetli basqısh boldı. Bul hújjet zorlıqtıń barlıq túrlerin qadaǵalaydı hám olardı islegeni ushın juwapkershilik kúsheytiliwin názerde tutadı.
Respublikada inklyuziv bilimlendiriw sisteması da jedel rawajlanbaqta, densawlıqtı saqlaw, balalardı sociallıq qorǵaw hám bilimlendiriw tarawında keń kólemli baǵdarlamalar ámelge asırılmaqta.
YuNISEF penen birge islesiw densawlıqtı saqlaw, sociallıq qorǵaw, bilimlendiriw sıyaqlı basqa áhmiyetli baǵdarlarda dawam ettiriledi. Hár bir balaǵa óz imkaniyatın júzege shıǵarıw múmkinshiligin beretuǵın qáwipsiz, salamat hám abat ortalıq jaratıwǵa ayrıqsha itibar qaratıladı.
Birgeliktegi is-háreketler Ózbekstannıń bala huqıqların qorǵaw tarawındaǵı xalıqaralıq standartlarǵa sadıq ekenliginen hám mámleketimizdiń balalar mápleri isenimli qorǵalatuǵın sharayatlar jaratıwǵa umtılatuǵınınan dárek beredi.
ÓzA