Taxtakópir rayonı hákimligi, Shańaraq hám hayal-qızlar bóliminiń shólkemlestiriwi menen Dáwir mákan puqaralar jıyını aymaǵındaǵı 5-sanlı mektepte «Zorlıqqa qarsı 16 kún» akciyası sheńberinde rayon hayal-qızları menen ushırasıw ótkerildi.
Ushırasıw barısında rayon hákiminiń orınbasarı G.Seytnazarova hám basqalar shıǵıp sóylep, hayal-qızlardıń shańaraqta, jámiyette tutqan ornı hám olardıń nızam menen qorǵalatuǵın huqıq hám erkinlikleri haqqında maǵlıwmatlar berilip, bul baǵdarda elimizde alıp barılıp atırǵan jumıslar tuwralı keń túrde aytıp ótildi.
Sonday-aq, rayon aymaǵında jasawshı hayal-qızlardıń mashqalaları úyrenilip, olarǵa huqıqıy másláhátler berildi hám ózleriniń talapshańlıǵı menen kópke órnek bolıp kiyatırǵan úlgili úy biykeleriniń is-tájiriybeleri ilaj qatnasıwshılarına úlgi etip kórsetildi. Ilajda qatnasıwshılar tárepinen hayal-qızlardıń nızam menen belgilengen huqıqları boyınsha sorawlar berilip, olarǵa qánigelerden tiyisli juwaplar aldı.
Bunnan soń, máhálledegi belsendi hayal-qızlar hám mektep oqıwshıları tárepinen shańaraqtaǵı zorlıq-zombılıqtıń kelip shıǵıwı boyınsha saxnalıq kórinisler jıynalǵanlardıń názerine usınılıp, bul ilaj qatnasıwshılarında ózgeshe tásir qaldırdı.
Adilbay Orazov,
Qaraqalpaqstan xabar agentligi sholıwshısı