1992-jılı 10-dekabr kúni «Ózbekstan Respublikasınıń mámleketlik gimni haqqında»ǵı nızamı qabıl etilgen edi. Búgin usı sánege 32 jıl tolmaqta.
Bayram múnásibeti menen Ájiniyaz atındaǵı Nókis mámleketlik pedagogikalıq institutınıń barlıq auditoriyalarında sabaqlar mámleketlik gimnniń atqarılıwı menen baslandı,-dep xabar bermekte instituttıń baspasóz xatkeri I.Mátekov.
Instituttıń kishi májilisler zalında sánege arnalǵan ushırasıw hám úgit-násiyat ilajı bolıp ótti.
Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Q.Reymov alıp bardı.
Ushırasıwda milliy ideya, ruwxıylıq tiykarları hám huqıq tálimi kafedrasınıń úlken oqıtıwshısı D.Bekimbetova dúnya mámleketleri gimnleriniń payda bolıw tariyxı, bir-birinen ózgeshelikleri, Ózbekstan Respublikasınıń mámleketlik gimniniń dóreliw tariyxı, búgingi kúndegi áhmiyeti, bul boyınsha nızamshılıqta belgilengen normalardıń mazmunı haqqında student-jaslar hám qatnasıwshılarǵa keń túrde maǵlıwmat berdi.
Atap ótilgenindey, dúnyadaǵı hár qanday ǵárezsiz mámleket óziniń mámleketlik nıshanlarına, sonıń ishinde, mámleketlik gimnine iye. Gimn haqqında sóz bolǵanda, dáslep onıń mánisine dıqqat awdarıw kerek boladı. «Gimn» sózi greksheden alınǵan bolıp, dástúriy xarakterdegi qosıqtı saltanatlı túrde atqarıw mánisin ańlatadı. Sol sebepli, bul atqarıwda xalıqtıń azatlıǵı, erkinligi jırlanǵan. Gimn aytılǵanda mámleket bayraǵı jelbirep, xalıqtı tolqınlandıradı. Solay eken, mámleketlik belgiler – gerb, bayraq hám gimn xalıqtıń, mámlekettiń birligin, awırbirshiligin ańlatatuǵın simvollardıń biri bolıp tabıladı.
Ilajda studentler de sózge shıǵıp, mámleketlik gimn jaslarda watanǵa muhabbat, bay tariyxımızǵa, milliy ózligimizge tereń húrmetti qáliplestiriwde, perzentlerimizdiń hár tárepleme kámil hám jetik insanlar bolıp jetisiwinde úlken áhmiyetke iye ekenligin atap ótti.

Qaraqalpaqstan xabar agentligi.