Prezident Shavkat Mirziyoev Tashkent wálayatı Bostanlıq rayonına kelip, dóretiwshilik jumısları menen tanıstı.
Sulıw tawlar qushaǵındaǵı bul aymaqtıń drayveri, álbette, turizm. Sońǵı jılları infrastruktura jaqsılanıp, jıldıń barlıq máwsiminde mazmunlı dem alıw imkaniyatı jaratıldı. Dem alıs, salamatlandırıw, shana, sayaxat, ulıwmalıq awqatlanıw kompleksleri qurıldı. Eski sanatoriy hám balalar dem alıw orınları jańalandı.
Atap aytqanda, bes jıl aldın rayonda 2 mıń 240 orınlıq 26 orın bolǵan bolsa, usı dáwirde tarawǵa 2 trillion sumnan aslam investiciya kirgizilip, 13 mıńnan kóp orınǵa iye 59 iri turizm imaratı iske qosıldı. Tiykarǵı avtomobil jolı ońlanıp, qosımsha jollar qurıldı.
Bulardıń nátiyjesinde turizm jedel rawajlandı, keliwshiler 12 esege arttı. Sonıń ishinde, bes jıl aldın Bostanlıqqa jılına 850 mıń turist kelgen bolsa, bıyıl 11 aydıń ózinde 12 million turist kelgen.
Bul pát izbe-iz dawam etpekte. Mámleketimiz basshısı usınday joybarlar menen tanıstı.
Shırshıq dáryasınıń boyında «Chorvoq dárwazası» turistlik kompleksi qurılmaqta. Derlik 25 gektar maydandaǵı komplekste 16 kóp qabatlı turaq jay, 3 miymanxana, 2 supermarket, 60 tan aslam sawda hám turmıslıq xızmet shaqapshaları, kafe hám restoranlar, bank ofisi, akvapark, muzıkalı fontan, avtomobil turıw ornı boladı. Imaratlardıń tóbesine quyash panelleri ornatıladı. Dárya ústinde seyil ushın shiysheli kópir qurıladı.
Kompleks kúnine 5 mıńnan artıq adamǵa xızmet kórsetiw quwatlılıǵına iye boladı. Máwsimlikleri menen birge 2 mıń 500 jumıs ornı jaratıladı.
Prezidentimiz xızmet túrlerin kóbeytip, jedel turizmdi rawajlandırıw, bunday komplekslerdi basqa rayonlarda da joybarlastırıw boyınsha kórsetpeler berdi. Aymaqta ekologiyaǵa ayrıqsha itibar beriw, jasıllıqtı kóbeytiw áhmiyetli ekenligi atap ótildi.

ÓzA