Ózbekistan Respublikası Prezidentiniń qararı

Ózbekistan Respublikası Prezidentiniń «Ózbekistan Respublikasınıń turizm potencialın rawajlandırıw ushın qolaylı sharayatlar jaratıw boyınsha qosımsha shólkemlestiriw ilajları haqqında»ǵı 2018-jıl 3-fevraldaǵı PP-5326-sanlı Pármanın orınlaw, sonday-aq, respublikaǵa turistler aǵımın kóbeytiw, kiriw turizmin milliy ekonomikanıń tiykarǵı tarmaqlarınan birine aylandırıw, elimizdiń mádeniy-tariyxıy miyrasları menen tábiyǵıy baylıqların keńnen úgit-násiyatlaw maqsetinde:

Tómendegiler:
Viza rejimin bunnan bılay da ápiwayılastırıw boyınsha ámeliy ilajlar rejesi 1-qosımshaǵa muwapıq;

Kiriw turizmin bunnan bılay da rawajlandırıw boyınsha ámeliy ilajlar rejesi 2-qosımshaǵa muwapıq;

Turizmdi rawajlandırıw máselelerinde óz-ara birge islesiwdi jedellestiriwdi támiyinlew boyınsha juwapker adamlar biriktiriletuǵın eller menen aymaqlardıń dizimi 3-qosımshaǵa muwapıq tastıyıqlansın.

2018-jıl 1-maydan baslap tranzit boyınsha háreketlenip atırǵan shet elli jolawshılarǵa keliwi menen 72 saat múddetke qısqa múddetli kiriw vizaların beriw engizilsin, onda olarda úshinshi elge aviabilet hám viza (zárúrlik bolǵanda) bar bolıwı jáne konsullıq jıyımların tólew talabı, sonday-aq, tastıyıqlanǵan turizm baǵdarlamaları boyınsha tanısıw túrleri ushın olardıń aeroport shegara aymaǵınan tısqarıǵa qısqa múddetli qadaǵalanatuǵın shıǵıw tártibi názerde tutılsın.
Ózbekistan Respublikası Ministrler Kabineti eki ay múddette usı bántti ámelge asırıw boyınsha, sonıń ishinde, puqaralardıń keliwi menen qısqa múddetli kiriw vizaları beriletuǵın ellerdiń dizimin tastıyıqlawdı názerde tutatuǵın Húkimet qararın qabıl etsin.

Ózbekistan Respublikası Ministrler Kabineti janındaǵı Din isleri boyınsha komiteti, Ministrler Kabineti janındaǵı Ózbekistandaǵı Islam civilizaciyası orayınıń hám Turizmdi rawajlandırıw boyınsha mámleketlik komitetiniń Ózbekistan Respublikası Ministrler Kabineti janındaǵı Din isleri boyınsha komitetinde Zıyarat etiw turizmin qollap-quwatlaw bólimin shólkemlestiriw haqqındaǵı usınısı maqullansın, oǵan ǵalaba xabar qurallarında, sonıń ishinde, shet el ǵalaba xabar qurallarında Ózbekistan haqqında Islam dini hám basqa da dúnya dinleriniń mádeniy-tariyxıy hám ilimiy-teologiyalıq orayı sıpatında málimleme materiallların úgit-násiyatlaw jáne tarqatıw júklensin.
Ózbekistan Respublikası Turizmdi rawajlandırıw boyınsha mámleketlik komiteti Sırtqı isler ministrligi, Ministrler Kabineti janındaǵı Din isleri boyınsha komitet hám basqa da mápdar ministrlikler hám vedomstvolar menen birgelikte eki ay múddette Ministrler Kabinetine tastıyıqlaw ushın:
tiykarǵı eller menen aymaqlardan Ózbekistan Respublikasına turistler aǵımın kóbeytiw boyınsha «jol qartaları»n;

Ózbekistan Respublikası zıyarat etiw turizmin rawajlandırıw boyınsha ámeliy ilajlar rejesin kirgizsin.

Ózbekistan Respublikası Turizmdi rawajlandırıw boyınsha mámleketlik komiteti hám «Ózbekistan hawa jolları» MAK Ózbekistan Respublikasınıń shet eldegi dipomatiyalıq wákilxanaların Ózbekistannıń turizm imkaniyatların tanıstıratuǵın zárúr málimleme materialları menen támiyinlesin, sonday-aq, zárúrlik bolǵanda, Ózbekistan Respublikasınıń shet eldegi diplomatiyalıq wákilxanalarına jaylasqan elde «Ózbekistan» turizm brendin úgit-násiyatlawǵa baǵıshlanǵan ilajlardı ótkeriw ushın byudjetten tısqarı Turizm tarawın qollap-quwatlaw qorınan qarjılar ajıratsın.
Ózbekistan Respublikası Sırtqı isler ministrligi Qarjı ministrligi hám Turizmdi rawajlandırıw boyınsha mámleketlik komiteti menen birgelikti eki ay múddette shet elli turistlerdi tartıw boljawın hám Ózbekistan Respublikasınıń shet eldegi diplomatiyalıq wákilxanaları basshıları menen xızmetkerlerin jaylasqan elinen turistler aǵımın kóbeytkeni ushın byudjet qarjıları esabınan sıylıqlaw, sonday-aq, respublikaǵa turistlerdiń aǵımın arttırıw boyınsha júklengen wazıypalardı zárúr dárejede orınlamaǵanı ushın juwapkerlik ilajların qollanıw tártibin islep shıqsın hám Ózbekistan Respublikası Ministrler Kabinetine tastıyıqlaw ushın kirgizsin.
«Ózbekistan hawa jolları» MAKqa Ózbekistan Respublikası Turizmdi rawajlandırıw boyınsha mámleketlik komiteti menen kelise otırıp, shet elli turistlerdi tartıw boljawın tastıyıqlaw hám «Ózbekistan hawa jolları» MAKtıń shet eldegi wákilxanaları basshıları menen xızmetkerlerin jaylasqan elinen turistler aǵımın kóbeytkeni ushın óz qarjıları esabınan sıylıqlaw, júklengen wazıypalardıń orınlanıwı támiyinlenbegen jaǵdaylarda bolsa, juwapkershilik ilajların qollanıw sistemasın engiziw usınıs etilsin.

«Ózbekistan hawa jolları» MAKqa qatnawlardıń básekiligin támiyinlew maqsetinde xalıqaralıq qatnawlar ushın aviabiletlerdi ózine túser bahasınan tómen bahalarda satıw huqıqı berilsin.
Ózbekistan Respublikası Qarjı ministrligi «Ózbekistan hawa jolları» MAK penen birgelikte eki ay múddette «Ózbekistan hawa jolları» MAKtıń salıq salınatuǵın bazasın arzanlatılǵan bahalar boyınsha satılǵan aviabiletler summasına azaytıw mexanizmin engizsin.

Ózbekistan Respublikası Turizmdi rawajlandırıw boyınsha mámleketlik komiteti:
2018-jıl 1-martqa shekem turistlerge operativ járdem kórsetiw ushın birden-bir qısqa ulıwma respublikalıq telefon nomerine iye bolǵan Call –oraydıń jumısı autsorsing shártlerinde shólkemlestiriwin támiyinlesin;

Ózbekistan Respublikası Sırtqı isler ministrligi, Ishki isler ministrligi, Milliy qáwipsizlik xızmeti, Densawlıqtı saqlaw ministrligi, Ayrıqsha jaǵdaylar ministrligi, Mámleketlik bajıxana komiteti, jergilikli atqarıwshı hákimiyat uyımları, basqa da mápdar ministrlikler hám vedomstvolar menen birgelikte Call–orayǵa múrájat etken turistlerge operativ járdem kórsetiw máselelerinde vedomstvolararalıq birge islesiwdi támiyinlesin.

Ózbekistan Respublikası Turizmdi rawajlandırıw boyınsha mámleketlik komitetiniń Call–orayı jumıs islewine baylanıslı qárejetler byudjetten tısqarı Turizm tarawın qollap-quwatlaw qorınıń qarjıları esabınan qarjılandırılatuǵını belgilep qoyılsın.

Tómendegiler:
turistler ushın jónelisti mólsherge alıwdı jeńillestiriw maqsetinde shet tillerindegi (inglis, rus hám basqa tillerde) kórsetkishlerdi ornatıw intası menen shıqqan xojalıq júrgiziwshi subektlerge usı kórsetkishlerdi olar tárepinen islep shıǵarılatuǵın ónimler (xızmetler hám jumıslar)diń reklamasın jaylastırıw huqıqı beriledi, onda reklama tarawına baylanıslı nızamshılıq talaplarına ámel etiliwi támiyinlengen halda jaylastırılıp atırǵan reklamanıń ulıwma maydanı kórsetkish maydanınıń 40 procentinen kóp bolmawı zárúrligi;

turistler tárepinen jámiyetlik orınlardı, imaratlar menen obektlerdi foto hám videosúwretke alıw hesh qanday sheklewlersiz ámelge asırılatuǵını, dizimi nızam hújjetlerine muwapıq tastıyıqlanatuǵın jáne barlıq túrdegi súwretke alıwlar qadaǵan etilgenligi haqqındaǵı tiyisli kórsetkishler ornatılǵan obektlerdiń buǵan kirmeytuǵını belgilep qoyılsın.

Ózbekistan Respublikası Turizmdi rawajlandırıw boyınsha mámleketlik komiteti, Ekologiya hám qorshaǵan ortalıqtı qorǵaw boyınsha mámleketlik komiteti hám Mádeniyat ministrligi hár sherekte hám jıl juwmaqlarına bola respublikanıń turizm imkaniyatları menen potencialı, onıń tariyxıy shaxsları, tariyxı, mádeniyatı, dástúrleri, sportı haqqındaǵı eń jaqsı video, fotolar menen audiomateriallardı anıqlaw boyınsha tańlawdı shólkemlestiriw hám ótkeriw arqalı jergilikli hám shet elli jeńimpazlardı anıqlaǵan halda tiyisliliginshe byudjetten tısqarı Turizm tarawın qollap-quwatlaw qorı, byudjetten tısqarı Ekologiya, qorshaǵan ortalıqtı qorǵaw hám shıǵındılardı joq etiw boyınsha qor jáne Mádeniyat hám kórkem ónerdi rawajlandırıw qorınıń qarjıları esabınan sıylıqlawdı támiyinlesin.
Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri Ózbekistan Respublikası Turizmdi rawajlandırıw boyınsha mámleketlik komiteti menen kelise otırıp, 2018-jıldan baslap hár jılı dáramatlar boljawı zıyatı menen orınlanǵan qarjılardan hám basqa da byudjetten tısqarı dáreklerdiń qarjıları esabınan xalıqaralıq turizm kórgizbeleri menen yarmarkalarında qatnasıw, sońǵılıǵında shet el jámiyetshiligi arasında tarqatıw maqsetinde tiyisli málimleme materialların tayarlaw jáne onı shet el ǵalaba xabar qurallarında reklama mapazların iske qosıw arqalı aymaqlardıń turizm potencialın úgit-násiyatlaw ushın qarjılar ajıratsın.
Ózbekistan Respublikası Mámleketlik bajıxana komiteti mápdar ministrlikler hám vedomstovlar menen birgelikte eki ay múddette altın buyımlar hám belgilengen tártipte tayarlanǵan ólshemli yombiler shet el turistleri tárepinen Ózbekistan Respublikasınan alıp shıǵılıwı tártibiniń ápiwayılastırılıwın názerde tutatuǵın Húkimet qararı joybarın Ózbekistan Respublikası Ministrler Kabinetine kirgizsin.
Ózbekistan Respublikası Turizmdi rawajlandırıw boyınsha mámleketlik komiteti eki ay múddette:
Mádeniyat ministrligi hám «Ózbekkino» milliy agentligi menen birgelikte Ózbekistan Respublikası Turizmdi rawajlandırıw boyınsha mámleketlik komiteti, Mádeniyat ministrligi hám «Ózbekkino» milliy agentliginiń buyırtpalarına bola, shet elli dóretiwshilik toparlarǵa respublikanıń turizm potencialı haqqındaǵı foto hám videomateriallardı tayarlaw ushın ushıwshısız ushıw apparatların, sonıń ishinde, dronlardı Ózbekistan Respublikası aymaǵına waqtınsha alıp kiriw hám olardan paydalanıw ushın ruqsatnamalardı beriw tártibin názerde tutatuǵın Húkimet qararı joybarın Ministrler Kabinetine kirgizsin;

2018-jıl 1-iyulge shekemgi bolǵan múddette «Ózbekistan hawa jolları» MAK, Ózbekistan Respublikası Ushıwlardıń qáwipsizligin qadaǵalaw boyınsha mámleketlik inspekciyası hám Qashqadárya wálayatı hákimligi menen birgelikte aldınǵı shet el tájiriybesin úyreniw tiykarında «Qarshı» xalıqaralıq aeroportın «Ózbekistan hawa jolları» MAK tıń quramınan shıǵarıp, xalıqaralıq aeroportlardı basqarıw boyınsha arnawlı kompaniya basqarmasına beriw, aeroport aymaǵında «Ashıq aspan» rejimin, sonıń ishinde, lokoster aviakompaniyaların tartqan halda engiziwdi názerde tutatuǵın «Qarshı» xalıqaralıq aeroportın rawajlandırıw koncepciyasın Ózbekistan Respublikası Ministrler Kabinetine kirgizsin.

Ózbekistan Respublikası Sırtqı isler ministrligi Ózbekistan Respublikası Prezidentiniń 2017-jıl 16-avgusttaǵı PQ-3217 sanlı qararı menen shólkemlestirilgen Shet elli turistler, sonıń ishinde, zıyarat etiw maqsetinde kelip atırǵan turistler ushın viza hám dizimnen ótiw tártip-qaǵıydaların basqıshpa-basqısh ápiwayılastırıwǵa baylanıslı usınıslar tayarlaw boyınsha jumısshı toparǵa hár sherekte tiyisli maǵlıwmatlar kirgizgen halda, usı qarar menen tastıyıqlanǵan Viza rejimin bunnan bılay da ápiwayılastırıw boyınsha ámeliy ilajlar rejesiniń ámelge asırılıwı ústinen turaqlı qadaǵalaw ornatsın.
Ózbekistan Respublikası Turizmdi rawajlandırıw boyınsha mámleketlik komiteti Sırtqı isler ministrligi menen birgelikte:
usı qarar menen tastıyıqlanǵan Kiriw turizmin rawajlandırıw boyınsha ámeliy ilajlar rejesi mápdar ministrlikler menen vedomstvolar tárepinen orınlanıwı ústinen turaqlı monitoring alıp barılıwın;

monitoring juwmaǵına bola, Ózbekistan Respublikası Prezidentiniń 2017-jıl 16-avgusttaǵı PQ-3217 sanlı qararı menen shólkemlestirilgen Turizmdi rawajlandırıw boyınsha muwapıqlastırıwshı keńeske rejelestirilgen ilajlardıń belgilengen múddetlerde sózsiz orınlanıwın támiyinlew maqsetinde tiyisli qararlardı qabıl etiw ushın hár sherekte usınıslar kirgizip barılıwın támiyinlesin.

Turizmdi rawajlandırıw boyınsha muwapıqlastırıwshı keńes (A.Aripov):
usı qararda názerde tutılǵan ilajlardıń sózsiz, óz waqtında hám sapalı orınlanıwı ústnen turaqlı hám sistemalı qadaǵalaw shólkemlestiriliwin;

ministrliklerdiń, vedomstvolar menen basqa da shólkemlerdiń basshıları – juwapker atqarıwshılardıń usı qarar menen tastıyıqlanǵan Kiriw turizmin bunnan bılay da rawajlandırıw boyınsha ámeliy ilajlar rejesiniń sózsiz orınlanıwı boyınsha olar tárepinen kórilip atırǵan ilajlardıń hár sherekte tıńlanıwın támiyinlesin.

Ózbekistan Respublikası Turizmdi rawajlandırıw boyınsha mámleketlik komiteti mápdar ministrlikler hám vedomstvolar menen birgelikte eki ay múddette nızam hújjetlerine usı qarardan kelip shıǵatuǵın ózgerisler menen qosımshalar haqqındaǵı usınıslardı Ózbekistan Respublikası Ministrler Kabinetine kirgizsin.
Usı qarardıń orınlanıwın qadaǵalaw Ózbekistan Respublikasınıń Bas ministri A.N.Aripovqa, Ózbekistan Respublikası Bas ministriniń orınbasarı S.R.Xolmuratovqa hám Ózbekistan Respublikası Turizmdi rawajlandırıw boyınsha mámleketlik komitetiniń baslıǵı A.A.Abduhakimovqa júklensin.
Ózbekistan Respublikası Prezidenti Sh.MIRZIYoEV

Tashkent qalası,

2018-jıl 6-fevral