Ózbekstan Respublikası Prezidenti Shavkat Mirziyoev 30-sentyabr kúni Xalıqaralıq futbol associaciyaları federaciyasınıń (FIFA) basshısı Janni Infantinonı qabılladı.
Sóylesiw aldınan FIFA Prezidenti Ózbekstannıń futboldaǵı jetiskenliklerin hám mámleketimizde sporttı hár tárepleme qollap-quwatlawǵa qaratılǵan nátiyjeli reformalardıń nátiyjelerin atap ótti.
Ózbekstan hám Ázerbayjanda iri abıraylı sport ilajı – 20 jasqa shekemgi jaslar arasında futbol boyınsha jáhán chempionatın ótkeriw ushırasıwdıń tiykarǵı teması boldı.
FIFA menen futboldı ǵalaba en jaydırıw, ásirese, jaslar arasında usı sport túrine qızıǵıwshılıqtı jáne de kúsheytiwge qaratılǵan birgeliktegi baǵdarlamalardı alǵa qoyıw baǵdarında nátiyjeli birge islesiw jolǵa qoyılǵanı úlken qanaatlanıwshılıq penen atap ótildi.
Sheriklikti, bárinen burın, futboldı shólkemlestiriw hám basqarıw sistemasın transformaciyalaw, jas talantlardı ashıw hám olardıń potencialın júzege shıǵarıwǵa járdemlesiw jáne trenerler, tóreshiler, menedjerler, sport shıpakerleri hám texnikalıq qánigelerdi xalıqaralıq dárejede tayarlaw baǵdarlarında jáne de keńeytiw máseleleri dodalandı.
Ózbekstanda FIFAnıń iri turnirleri hám ilajların shólkemlestiriw jáne Tashkent qalasında federaciyanıń regionallıq wákilxanasın ashıw procesin jedellestiriwge ayrıqsha itibar qaratıldı.
ÓzA