Ózbekstan Respublikası Oliy Majlisi Senatınıń Baslıǵı Tanzila Norboeva Ózbekstan – Belarus parlamentleraralıq forumında qatnasıw ushın elimizge kelgen Belarus Respublikası Milliy májilisi Respublikalıq Keńesiniń Baslıǵı Natalya Kochanova menen ushırastı.
Onda Ózbekstan hám Belarus arasındaǵı parlamentleraralıq birge islesiwdi izbe-iz rawajlandırıw, baylanıslardı bunnan bılay da bekkemlew hám eki tárepleme qatnasıqlardıń jańa baǵdarların belgilew máseleleri hár tárepleme dodalandı.
Tárepler parlamentler arasındaǵı turaqlı hám ashıq-aydın sóylesiwdi dawam ettiriw, mámleket basshıları dárejesinde erisilgen kelisimlerdi turmısqa engiziwde parlamentlerdiń rolin bunnan bılay da kúsheytiw áhmiyetli ekenin atap ótti. Parlament komitetleri, parlamentleraralıq birge islesiw toparları hám aymaqlar arasındaǵı tikkeley baylanıslardı jedellestiriw boyınsha pikir alısıldı.
Sawda-ekonomikalıq birge islesiwdi keńeytiw ushırasıwdıń áhmiyetli baǵdarlarınan biri boldı. Awıl xojalıǵı, mashina qurılısı, farmacevtika, elektrotexnika, toqımashılıq hám basqa da tiykarǵı tarmaqlarda birgeliktegi joybarlardı kóbeytiw, isbilermenler arasında tikkeley birge islesiwdi keńeytiw hám óz-ara sawda kólemin arttırıw ushın parlament diplomatiyası imkaniyatlarınan jáne de nátiyjeli paydalanıw zárúr ekenligi atap ótildi.
Usı kózqarastan, parlamentler tek ǵana siyasiy sóylesiwdi rawajlandırıw emes, al biznes wákilleri ushın jańa imkaniyatlar jaratıw, investiciyalıq hám kooperaciyalıq joybarlardı qollap-quwatlawda da belsene qatnasıwı zárúr ekenligi atap ótildi.
Ushırasıwda shólkemlesken miynet migraciyası tarawındaǵı birge islesiwge de ayrıqsha itibar qaratıldı. Puqaralardı nızamlı tiykarda jumıs penen támiyinlew, olardıń miynet, medicinalıq hám sociallıq huqıqların isenimli qorǵaw boyınsha birge islesiw mexanizmlerin bunnan bılay da jetilistiriw boyınsha pikir alısıldı.
Mádeniy-gumanitarlıq tarawdaǵı birge islesiwdi jańa mazmun menen bayıtıw, bilimlendiriw, densawlıqtı saqlaw hám turizm baǵdarlarında ámeliy joybarlardı keńeytiw áhmiyetli ekenligi atap ótildi.
Atap aytqanda, mádeniyat kúnleri, rektorlar forumları hám medicina forumların turaqlı ótkeriw, jaslardıń qatnasıwında birgeliktegi baslamalardı ámelge asırıw, sonday-aq, Ózbekstan hám Belarus oqıwshıları arasında tikkeley baylanıslardı jolǵa qoyıwǵa qaratılǵan jańa joybarlardı qollap-quwatlaw zárúr ekenligi atap ótildi.
Ushırasıw juwmaǵında Ózbekstan hám Belarus parlamentleri arasındaǵı birge islesiwdi institucionallıq jaqtan jáne de bekkemlew, aymaqlararalıq baylanıslardı keńeytiw, isbilermenlik baslamaların qollap-quwatlaw hám xalıqaralıq parlament platformaları sheńberinde óz-ara birge islesiwdi jedellestiriw boyınsha kelisimlerge erisildi.

Norgul Abduraimova,
ÓzA