Qádirli ul-qızlarım!
Húrmetli ustazlar hám trenerler!
Dúnya shaxmat aspanında jarqın juldız bolıp jarqıraǵan siz, áziz perzentlerimdi 46-Jáhán shaxmat olimpiadasında erisken tariyxıy jeńisińiz benen shın kewlimnen qutlıqlayman.
Eki márte olimpiada chempionı degen joqarı abıraylı ataq, ullı jeńis bárshemizge, kóp milletli xalqımızǵa múbárek bolsın!
Mine, usı oǵada tolqınlandırıwshı máwritlerde 200 den aslam mámleketten 2 mıńǵa shamalas eń kúshli hám belgili grossmeysterler, abıraylı komandalar qatnasqan mawasasız bellesiwlerde kórsetken aqıl-parasatıńız, joqarı erk-ıqrarıńız, sheberligińiz hám mártligińiz ushın pútkil elimiz, dúnya shaxmat jámiyetshiligi sizlerge alǵıs aytpaqta.
Sizler – Jańa Ózbekstan qaharmanları, jáhán shaxmat áleminde jańa tariyx jaratqan altın áwladsız. Pútkil xalqımız sizler menen sheksiz maqtanadı.
Bul abıraylı jarıslarda sizler teńsiz aqıl hám oy-pikir iyeleri bolǵan Muhammed Xorezmiy, Axmed Ferǵaniy, Beruniy, Ibn Sina, Ámir Temur, Mırza Ulıǵbek, Áliysher Nawayı sıyaqlı ullı ata-babalarımızǵa múnásip miyrasxorlar ekenińizdi ámelde kórsettińiz.
Sizler ámeldegi Olimpiada chempionı – Hindstan komandasın jeńdińiz. Áyyemgi shaxmat mektebi hám kóplegen grossmeysterlerge iye bolǵan Qıtay komandası ústinen tariyxıy jeńisti qolǵa kirgizdiniz. Dúnya reytinginde birinshi orındı iyelep kiyatırǵan, altı márte Olimpiada chempionı bolǵan AQSh komandasınan da ústin keldiniz.
Nodirbek Abdusattorov barlıq oyınlar dawamında jeńilis ne ekenin bilmesten, haqıyqıy komanda jetekshisi ekenin dálillep, birinshi taxtaǵa altın medal iyesine aylandı.
Nodirbek Yoqubboev bolsa Túrkiya, Hindstan, Qıtay hám AQSh wákillerine qarsı mawasasız bellesiwlerde haqıyqıy erk-ıqrar hám mártlik kórsetip, komandamız ushın sheshiwshi jeńislerdi támiyinlegenin ayrıqsha atap ótpekshimen.
Ásirese, Yoqubboevtıń hindstanlı Nihal Saringe qarsı gúresi haqıyqıy dramalıq sawash boldı. Jańa Ózbekstan wákiliniń eń qıyın jaǵdayda oǵada tapqırlıq penen qollanǵan taktikalıq júrislerin kórip, dúnya shaxmat ıqlasbentleri hayran bolıp qatıp qaldı.
Jáne bir márt ulımız, Javohir Sindorov chempionlarǵa tán oyın kórsetip, ulıwma jeńiske úlken úles qostı.
Bunday iri xalıqaralıq jarısta birinshi márte qatnasqan Muhiddin Madaminov ulımızdıń kúshli qarsılaslarına kútilmegen soqqılar bergen hám birde-bir jeńiliske ushıramaǵanı joqarı bahaǵa ılayıq.
Shamsiddin Vohidov Hindstan, Túrkiya hám Vengriya wákillerine qarsı mawasasız oyınlarda ózin joǵaltpastan, áhmiyetli upaylardı qolǵa kirgizgeni de jankúyerler yadında saqlanıp qaladı.
Bir sóz benen aytqanda, saylandı komandamız aǵzalarınıń hár biri ózine isenip, tek ǵana alǵa qarap barǵanın kórip, Jańa Ózbekstanda qanday ullı shaxmat mektebi, shaxmatshılar áwladı qálipleskenine pútkil dúnya tán berdi.
Jarıslarda ekinshi quram menen qatnasqan komandamızdıń kórsetken nátiyjesi de bizdi quwandıradı.
Jahongir Vohidov ulım kúshli erk-ıqrar kórsetip, bul komandamızdı sıylı orınlarǵa qaray basladı. Ispaniya, Angliya hám Niderlandiya sıyaqlı mámleketlerdiń wákilleri ústinen erisilgen isenimli jeńisler umıtılmas tariyxqa aylandı.
Hayal-qızlar komandamız da keskin gúreslerde haqıyqıy mártlik úlgisin kórsetti. Olar AQSh komandası menen teńdey belleskeni, 11 turda 7 jeńiske erisip, on úshinshi orındı qolǵa kirgizgeni de áhmiyetli nátiyje bolıp esaplanadı.
Samarqand olimpiadasında para shaxmatshılarımız da úlken mártlik kórsetip, bunday oyınlar tariyxında birinshi márte qola medalın qolǵa kirgizdi. Selbi qızım jeke esabında gúmis, Abdulaziz ulım qola medalına iye bolǵanı, Ahadxon ulım ulıwma jeńilmegeni meni júdá quwandırdı.
Elimiz barlıq shaxmatshılarımız tımsalında kúshli bilim hám erk-ıqrar iyelerin, úlken-úlken sheklerdi iyelewge uqıplı bolǵan Jańa Ózbekstan jasların kóredi.
Álbette, bul joqarı jeńis bárshemizge jańa kúsh-ǵayrat, ruwx hám ilham baǵıshlaydı, jas áwladımız ushın haqıyqıy ibrat úlgisi bolıp xızmet etedi.
Elimizde shaxmattıń rawajlanıwına berilip atırǵan turaqlı itibar, jolǵa qoyılǵan nátiyjeli sistema hám qolaylı sharayatlar sizler erisken nátiyjelerdi támiyinlewde áhmiyetli faktor boldı. Jaqında bul boyınsha jáne bir Prezident qararın qabıl ettik. Bul hújjet jaqın keleshekte jáne de úlken nátiyjeler ushın, álbette, bekkem tiykar jaratadı.
Ózbekstan shaxmat federaciyası FIDE tárepinen 2026-jılı “Eń jaqsı federaciya” nominaciyasında jeńimpaz dep tabılǵanı, tájiriybeli trener, grossmeyster Rustam Qosimjonov FIDEniń húrmetli vice-prezidenti, Hulkar Tohirjonova FIDEniń Oraylıq Aziya mámleketleri boyınsha regionallıq prezidenti etip saylanǵanın Ózbekstannıń shaxmat mámleketi sıpatında abırayı artıp atırǵanınıń jáne bir dálili sıpatında qabıl etemiz.
Áziz perzentlerim!
Eki hápte dawamında sawlatlı Samarqand qalası misli jáhán shaxmatınıń paytaxtına aylandı. Bul jerde bolıp ótken abıraylı jarıslar, qatnasıwshı mámleketler hám shaxmatshılardıń sanı boyınsha rekord nátiyjeler menen tariyxqa kirgenin ayrıqsha atap ótiw kerek.
Bárshemizdiń ulıwma jeńisimiz úsh mıń jıllıq bay tariyx hám mádeniyat hawazı kelip turǵan, XIV-XV ásirlerde Ekinshi Renessans oraylarınan biri bolǵan bul ullı qalada qolǵa kirgizilgeni onıń qádir-qımbatın jáne de arttırmaqta.
Usı jılı noyabr ayında bizdi jáne bir úlken shaxmat bayramı kútip turıptı. Jáhán tajı ushın bolatuǵın tariyxıy bellesiwde shaxmatımız maqtanıshı Javohir Sindorovtan bárshemiz úlken jeńislerdi kútip qalamız. Sen buǵan álbette uqıplısań, Javohir balam!
Pursattan paydalanıp, 46-Jáhán shaxmat olimpiadasında Watanımızdıń abırayın joqarılatıwǵa múnásip úles qosqan ul-qızlarımızǵa, olardıń ata-analarına, ustaz hám trenerlerine, saylandı komandamızdıń barlıq aǵzalarına shın júrekten minnetdarshılıq bildiremen.
Bul jarıslardı joqarı dárejede shólkemlestirgen, olimpiada qatnasıwshılarına xalqımızǵa tán miymandoslıq, húrmet-izzet kórsetken Samarqand wálayatı xalqına hám jergilikli hákimlik wákillerine, barlıq shólkemlestiriwshilerge úlken raxmet aytamız.
Sizlerge bekkem densawlıq, shańaraqlıq baxıt, kelesi jumısıńızda úlken tabıslar tileymen.
Bizge mine, usınday ullı dańq, ullı jeńislerdi inam etken shaxmatshı perzentlerimiz bárqulla saw-salamat bolsın!
Sizlerge hámiyshe aydın jeńisler yar bolsın, áziz perzentlerim!
Shavkat Mirziyoev,
Ózbekstan Respublikası Prezidenti