Qurılıs tarawında miynet etip atırǵan xızmetkerler ushın saatlıq eń kem miynet haqını arttırıw hám onı barlıq aymaqlar ushın birden-bir muǵdarǵa keltiriw rejelestirilmekte. Onıń ushın jańa tártipti názerde tutatuǵın Prezident qararınıń joybarı islep shıǵıladı.
Prezidentimizdiń 2026-jıl 27-avgusttaǵı “Isbilermenler menen VI ashıqtan-ashıq sóylesiwinde belgilengen wazıypalardı ámelge asırıw ilajları haqqında”ǵı Pármanında qurılıs tarawına baylanıslı bir qatar áhmiyetli wazıypalar belgilendi. Atap aytqanda, hújjet penen qurılıs tarawında jumıstı bólip alıp islewshi hám joybarlaw shólkemleriniń jumısın xoshametlew, olardı rawajlandırıwdıń jańa mexanizmlerin engiziw boyınsha Prezident qararınıń joybarın islep shıǵıw belgilengen.
Tayarlanatuǵın qarar joybarında qurılıs tarawında miynet etip atırǵan xızmetkerler ushın saatlıq eń kem miynet haqı muǵdarın arttırıw názerde tutılmaqta. Sonıń menen birge, bul tólem muǵdarın mámlekettiń barlıq aymaqları ushın teńlestiriw rejelestirilgen. Bul norma, bárinen burın, birdey miynet etip atırǵan qurılıs xızmetkerleriniń jumıs haqı haqqında aymaqlar kesimindegi parıqlardı azaytıwǵa qaratılǵan. Biraq házirshe jańa saatlıq eń kem miynet haqınıń qansha muǵdarda bolatuǵını anıq belgilenbegen. Onıń muǵdarı ayrıqsha Prezident qararı menen belgilenetuǵını kútilmekte. Qurılıs tarawına baylanıslı jańa mexanizmler tek ǵana xızmetkerlerdiń miynetine haqı tólew menen sheklenbeydi.
Hújjetke bola, mámleketlik byudjet qarjılarınıń esabınan ámelge asırılatuǵın qurılıs-montajlaw jumıslarınıń smetalıq bahasında jumıstı bólip alıp islewshi shólkemlerdiń rejeli paydasınıń muǵdarın 7 procentke shekem belgilew usınıs etilmekte. Bul óz gezeginde mámleket qarjıları esabınan ámelge asırılatuǵın qurılıs joybarlarında jumıstı bólip alıp islewshi shólkemlerdiń ekonomikalıq máplerin esapqa alıw hám tarawda jumıs alıp barıw nátiyjeliligin arttırıwǵa xızmet etiwi múmkin.
Joybarda qurılıs obektlerin joybarlastırıw jumısların qarjılandırıw tártibin de jetilistiriw názerde tutılǵan. Onda qarjılandırıw kólemi obekttiń quramalılıq dárejesi hám ózine tán ózgesheliklerine qarap belgilenetuǵını rejelestirilmekte. Usı tárizde quramalılıǵı joqarı bolǵan obektlerdi joybarlastırıw ushın jumsalatuǵın miynet hám resurslardıń bahasın ádalatlıraq esapqa alıw maqset etilgen.
Qurılıs shólkemleriniń finanslıq júgin azaytıwǵa qaratılǵan jáne bir áhmiyetli usınıs – injenerlik-kommunikaciya infrastrukturası ushın jıyımlar boyınsha avans tólemin azaytıw názerde tutılǵan.
Ámeldegi 20 procentlik avans tólemin 5 procentke túsiriw rejelestirilmekte. Bul elektr, gaz, suw hám basqa da injenerlik-kommunikaciya infrastrukturası menen baylanıslı qárejetlerdi ámelge asırıwda qurılıs shólkemleriniń aylanıs qarjıların únemlew imkaniyatın beriwi múmkin. Qurılıs tarawında jumıstı bólip alıp islewshi hám joybarlaw shólkemlerin qollap-quwatlaw jáne saatlıq eń kem miynet haqı boyınsha jańa mexanizmlerdi belgileytuǵın Prezident qararınıń joybarın 2027-jıl yanvar ayında tayarlaw belgilengen.
Bul wazıypanı ámelge asırıwǵa Ministrler Kabineti, Qurılıs hám turaq jay kommunallıq xojalıǵı ministrligi jáne Ekonomika hám qarjı ministrligi juwapker etip belgilengen. Solay etip, qurılıs tarawında islewshiler ushın saatlıq eń kem miynet haqını arttırıw máselesi házirshe reje hám nızamshılıq joybarı basqıshında. Anıq muǵdar bolsa keleshekte islep shıǵılatuǵın Prezident qararı menen belgilenedi.

ÓzA