Teńgeler 999,9 tazalıqtıń altın hám gúmisinen shıǵarılǵan. Hár bir teńgeniń salmaǵı 31,1 grammdı, nominal bahası – 100 000 sumdı quraydı.
Ózbekstan Oraylıq banki mámleket ǵárezsizliginiń 35 jıllıǵına baǵıshlanǵan estelik altın hám gúmis teńgeler kollekciyasın aylanısqa shıǵardı. Bul haqqında Oraylıq bank baspasóz xızmeti xabar beredi.
Úsh teńgeden ibarat kollekciya birden-bir kórkem koncepciyada Ózbekstannıń milliy mámleketshiligi, tariyxıy miyrası, milliy qádiriyatları hám zamanagóy rawajlanıw ideyaların jámlegen.
Birinshi teńgede xalıq azatlıǵı, milliy maqtanısh hám ǵárezsiz mámleketshilik tımsalı bolǵan Ǵárezsizlik monumenti súwretlengen. Monument artınan taralıp atırǵan quyash nurları ǵárezsizlik alıp kelgen imkaniyatlar hám aydın keleshek belgisi sıpatında talqılanadı.
Teńgeniń revers (arqa) tárepinde Ózbekstan Mámleketlik bayraǵı hám ol qabıl etilgen sáne – 1991-jıl 18-noyabr súwretlengen.
Ekinshi teńge Ózbekstannıń tariyxıy hám ruwxıy miyrasına baǵıshlanǵan. Onıń avers (aldınǵı) tárepinde Tashkenttegi Islam civilizaciyası orayı súwretlengen. Bul arxitekturalıq obraz mámlekettiń dúnya iliminiń, mánawiyatınıń hám islam civilizaciyasınıń rawajlanıwına qosqan úlesin sáwlelendiredi.
Revers tárepinde bolsa Ózbekstan Mámleketlik gerbi hám ol qabıl etilgen sáne – 1992-jıl 2-iyul sáwlelendirilgen.
Úshinshi tengeniń tiykarǵı kompoziciyalıq elementi “35” sanı bolıp esaplanadı. Revers tárepinde Ózbekstan Mámleketlik gimninen «Olamni mahliyo aylagan diyor!» qatarı hám gimn qabıl etilgen sáne – 1992-jıl 10-dekabr jaylastırılǵan.
Estelik teńgeler 999,9 tazalıqtaǵı altın hám gúmisten basılǵan. Hár bir teńgeniń salmaǵı 31,1 grammdı, nominal bahası – 100 000 sumdı quraydı. Teńgeler úsh nusqadan ibarat kollekciya toplamı sıpatında da, óz aldına da satıladı.
Altın estelik teńgelerdiń baslanǵish sanı 450 dananı, gúmis teńgelerdiń sanı bolsa 800 dananı quraydı. Bazar talabına qarap san arttırılıwı múmkin. Satıwlar 27-avgust kúni kommerciyalıq banklerdiń 690 filialında baslandı.
Qaraqalpaqstan xabar agentligi