Ózbekstanda pensiya támiynatı sistemasındaǵı ózgerisler xalıqtıń dáramatlarınıń sociallıq qorǵawǵa baylanıslı áhmiyetli kórsetkishlerinen birinde sáwlelenbekte.
Milliy statistika komitetiniń maǵlıwmatlarına bola, 2025-jılı Ózbekstanda ortasha aylıq pensiya muǵdarı 1 million 649,2 mıń sumdı quraǵan. Bul kórsetkish 2016-jıldaǵı 494,2 mıń sumǵa salıstırǵanda 3,3 esege joqarı.
Sanlarǵa názer taslansa, 2016-2025-jıllar aralıǵında ortasha pensiya muǵdarı hár jılı ósip barǵanın kóriw múmkin. 2016-jılı 494,2 mıń sum bolǵan kórsetkish 2020-jılǵa kelip 848,5 mıń sumǵa, 2023-jılı bolsa 1 million 234,5 mıń sumǵa jetken. Ásirese, keyingi jıllarda ósiw páti sezilerli bolǵan. 2024-jılı ortasha pensiya 1 million 495,6 mıń sumdı quraǵan bolsa, 2025-jılı bul kórsetkish 1 million 649,2 mıń sumǵa jetti. Yaǵnıy, bir jılda 153,6 mıń sumǵa artqan.
Jıllar kesiminde ortasha aylıq pensiya muǵdarı tómendegishe qáliplesken. 2016-jıl 494,2 mıń sum, 2017-jıl 556,8 mıń sum, 2018-jıl 640,5 mıń sum, 2019-jıl 733,2 mıń sum, 2020-jıl 848,5 mıń sum, 2021-jıl 963,6 mıń sum, 2022-jıl 1 080,8 mıń sum, 2023-jıl 1 234,5 mıń sum, 2024-jıl 1 495,6 mıń sum, 2025-jıl – 1 649,2 mıń sumdı quraǵan. Ulıwma, 10 jıllıq dáwirde ortasha pensiya 1 million 155 mıń sumǵa kóbeygen. Bul pensiya tólemleriniń nominal muǵdarı sezilerli dárejede artqanın ańlatadı.
Sonıń menen birge, ekonomikalıq tallawda pensiya muǵdarınıń ósiwin bahalawda inflyaciya hám tutınıw bahalarınıń ózgeriwin de esapqa alıw áhmiyetli. Sebebi, nominal pensiyanıń artıwı pensionerlerdiń real satıp alıw qábileti usı dárejede óskenligin ańlatpaydı. Usı kózqarastan, pensiyalar dinamikasın xalıqtıń dáramatları hám bahalardıń ózgeriwi menen birgelikte bahalaǵanda tolıǵıraq kórinis payda boladı.

Sh.Mamaturopova,
ÓzA