Ózbekstan Prezidenti Singapurdıń Premer ministrin qabılladı

654

Ózbekstan Respublikası Prezidenti Shavkat Mirziyoev 28-avgust kúni Singapur Respublikasınıń Premer ministri Li Syan Lunnıń basshılıǵındaǵı delegaciyanı qabılladı.
Sóylesiw aldınan Premer ministr Singapur Prezidenti Tarman Shanmugaratnam hám Bas ministri Lourens Vongtıń qızǵın sálemi hám jaqsı tileklerin jetkerdi.
Ózbekstan – Singapur qatnasıqları izbe-iz rawajlanıp atırǵanı qanaatlanıwshılıq penen atap ótildi. Siyasiy sóylesiw hám barlıq dárejelerdegi eki tárepleme baylanıslar jedel qollap-quwatlanbaqta.
Tovar almasıw kólemi hám qospa kárxanalardıń sanı jedel pátlerde ósip barmaqta. Singapurdıń elimiz ekonomikasına kirgizgen investiciyalarınıń kólemi derlik 2 milliard dollardı quradı.
Singapur isbilermenleriniń elimizdegi investiciyalıq jumısın keńeytiw rejeleri qollap-quwatlandı. Strategiyalıq hám innovaciyalıq sheriklik boyınsha orta múddetli birgeliktegi baǵdarlamanı islep shıǵıp, onda sawda, investiciyalar, texnologiyalar transferi, mámleketlik basqarıw sistemasın modernizaciyalaw, insan kapitalın rawajlandırıw, sanlastırıw hám basqa da baǵdarlarǵa ústinlik beriwge kelisip alındı.
Ózbekstanda arnawlı ekonomikalıq zonalardıń jumısın jetilistiriw, Tashkent xalıqaralıq finans orayı hám sanlı bank sistemasın rawajlandırıwda Singapurdıń aldınǵı tájiriybesin engiziwge ayrıqsha itibar qaratıldı.
Singapur joqarı bilimlendiriw mákemeleriniń mámleketimizdegi jumısı bunnan bılay da qollap-quwatlanatuǵını bildirildi.
Joqarı dárejede erisilgen kelisimlerdi ámelge asırıw procesin bahalaw hám birgeliktegi rejelerdi muwapıqlastırıw ushın siyasiy hám ekonomikalıq strukturalar arasında turaqlı sóylesiwdi jolǵa qoyıw zárúr ekenligi atap ótildi.
Jaqında Ózbekstan BMShtıń Mediaciya haqqındaǵı Singapur konvenciyasına qosılǵanı qollap-quwatlandı.
Xalıqaralıq shólkemler sheńberinde óz-ara qollap-quwatlaw hám regionallıq birge islesiw máseleleri boyınsha da pikir alısıldı.
ÓzA