Endi respublika isbilermenleri sırt el sertifikatların alıw ushın arzanı onlayn tárizde tapsırıwı múmkin.
Texnikalıq jaqtan tártipke salıw agentligi tárepinen eksportyorlar ushın jáne bir qolaylıq engizildi. Atap aytqanda, xalıqaralıq ISO, OEKO-TEX, GlobalG.A.P., Evropanıń CE hám basqa da usı sıyaqlı standart hám sertifikatlardı alıw zárúrligi tuwılǵanda arzanı “Texnikalıq tártipke salıw” milliy málimleme sisteması arqalı jiberiw imkaniyatı jaratıldı.
Bul ushın tris.uz sistemasındaǵı «Sertifikatlash» bólimine kirip, «Eksport sertifikatini olishga ariza berish» xızmetin tańlaw kerek. Bunnan keyin arza beriwshi, eksport etilip atırǵan ónim hám alınıwı zárúr bolǵan sertifikat haqqındaǵı maǵlıwmatlar kirgiziledi.
Arza qabıl etilgennen soń, Agentliktiń juwapker xızmetkerleri isbilermen menen baylanısıp, sırt el sertifikatın alıw procesine ámeliy járdem kórsetedi.
Jańa xızmet, ásirese, sırtqı bazarlarǵa shıǵıwdı rejelestirip atırǵan isbilermenler ushın ayrıqsha áhmiyetke iye. Sebebi xalıqaralıq standart hám sertifikatlardıń bar ekenligi ónimlerdi sırt el bazarlarına alıp shıǵıwda áhmiyetli talaplardan biri bolıp esaplanadı.
Usı tárizde, sertifikatlaw procesin sanlastırıw arqalı eksportyorlar ushın zárúr hújjetlerdi rásmiylestiriwdegi shólkemlestiriw máselelerin jeńilletiw hám sırtqı bazarlarǵa shıǵıw imkaniyatların keńeytiwge qaratılǵan jáne bir qádem taslandı.
Shahnoza Mamaturopova, ÓzA