Ózbekstanda fizikalıq shaxslar arasında mobil telefon nomeri arqalı pul ótkermelerdi ámelge asırıw tártibi belgilendi. Oraylıq bank basqarmasınıń tiyisli qararı 24-avgust kúni mámleketlik dizimnen ótkerilgen bolıp, hújjet rásmiy járiyalanǵanınan úsh ay ótkennen keyin kúshke kiredi.
Jańa tártip engizilgennen soń, puqaralar pul jiberiwde alıwshınıń bank esap beti yamasa bank kartası rekvizitlerin kirgiziwi shárt bolmaydı. Bunıń ushın alıwshınıń mobil telefon nomeri onıń bank esap betine baylanısqan bolıwı jeterli.
Pul ótkermeleri Oraylıq banktiń Tez tólemler sisteması arqalı ámelge asırıladı. Bir bank sheńberinde bir mobil telefon nomerin tek bir bank esap betine biriktiriw múmkin.
Telefon nomerin esap betke baylanıstırıw juwmaqlanǵannan soń, arnawlı “baylanıstırıw kodı” qáliplestiriledi. Puqara bul baylanıstı qálegen waqıtta mobil qosımsha arqalı yamasa bankke tikkeley múrájat etip biykar etiwi múmkin.
Pul ótkeriw qalay ámelge asırıladı?
Pul jiberiwshi banktiń mobil qosımshasında alıwshınıń telefon nomeri yamasa “baylanıstırıw kodı”n kirgizedi. Bunnan keyin sistema qabıllawshınıń esap beti haqqındaǵı maǵlıwmatlardı anıqlaydı.
Ótkermeni tastıyıqlawdan aldın paydalanıwshıǵa alıwshınıń F.I.O., banki hám komissiyalıq haqı haqqında maǵlıwmat kórsetiledi. Sonnan keyin tólewshi operaciyanı tastıyıqlaydı.
Mobil qosımsha arqalı ámelge asırılatuǵın bunday ótkermeler 24/7 rejiminde, real waqıtta orınlanadı. Tikkeley bankke múrájat arqalı ámelge asırılatuǵın ótkermeler bolsa banktiń jumıs kúnleri hám jumıs waqtında orınlanadı.
Qararda málimleme hám kiberqáwipsizlikti támiyinlew, sonday-aq, aldawshılıqtıń aldın alıw boyınsha talaplarǵa ámel etiw májbúriy ekenligi de belgilengen.
Ótkeriw tabıslı ámelge asırılǵannan soń, tólewshige operaciyanı tastıyıqlawshı hújjet usınıladı. Onda ótkermeniń nomeri hám waqtı, tólem sistemasındaǵı nomer, banklerdiń atı, tólewshi hám alıwshınıń maǵlıwmatları, sonday-aq, ótkerme hám komissiyalıq haqınıń summası kórsetiledi.
Solay etip, jańa sistema iske qosılǵannan soń, puqaralar pul jiberiw ushın alıwshınıń bank rekvizitlerin izlep otırmay-aq, mobil telefon nomeri arqalı qarjı ótkeriw imkaniyatına iye boladı.
Sh.Mamaturopova, ÓzA