Mámleketlik sociallıq qamsızlandırıw sistemasında napaqalardı tayınlaw hám tólew tártibi sanlastırılmaqta.
Mámleketlik sociallıq qamsızlandırıw sistemasında puqaralarǵa hámiledarlıq hám tuwıw jáne waqtınsha miynetke jaramsızlıq (kesellik) boyınsha napaqalardı tayınlaw hám tólewdiń jańa tártibi engizildi. Endi tayınlanǵan napaqa qarjıları puqaranıń “Baraka” sociallıq kartasına tikkeley ótkerip beriledi.
Ekonomika hám qarjı ministrliginiń maǵlıwmatına bola, bul tártip napaqa alıw procesin ápiwayılastırıw, artıqsha byurokratiyalıq processlerdi qısqartıw hám sociallıq tólemlerdi puqaralarǵa tez hám qolaylı jetkerip beriwge qaratılǵan.
Eger puqarada “Baraka” sociallıq kartası bar bolsa, hámiledarlıq hám tuwıw yamasa waqtınsha miynetke jaramsızlıq napaqası tayınlanǵanınan soń qarjılar qosımsha arza yamasa múrájat talap etilmegen halda avtomat túrde usı kartaǵa ótkeriledi. Onda puqaranıń bankke barıwı, óz aldına esap bet ashıwı yamasa napaqanı alıw ushın qosımsha hújjetlerdi usınıwı talap etilmeydi. Bul, ásirese, kesellik yamasa hámiledarlıq dáwirinde bolǵan puqaralar ushın napaqa qarjılarınan paydalanıw procesin biraz jeńillestiredi.
Puqarada “Baraka” sociallıq kartası bolmaǵan jaǵdayda da napaqa alıw procesi toqtap qalmaydı. Napaqa tayınlanǵanınan keyin puqara ushın “Baraka” mobil qosımshası arqalı virtual sociallıq karta avtomat túrde ashıladı. Tayınlanǵan napaqa qarjıları mine, usı virtual kartaǵa ótkerip beriledi. Áhmiyetlisi, virtual sociallıq kartaǵa iye bolıw ushın bankke barıw yamasa óz aldına múrájat etiw shárt emes. Puqara karta hám oǵan túsken qarjılar haqqındaǵı maǵlıwmatlardı “Baraka” mobil qosımshası arqalı kóriwi múmkin.
Endi puqara napaqa tayınlanǵannan keyin bankke barıw, óz aldına esap beti ashıw yamasa qosımsha hújjetler usınıw sıyaqlı artıqsha processlerge dus kelmeydi. Tólemlerdiń elektron túrde ámelge asırılıwı qarjılardı puqaraǵa operativ, qolaylı hám ashıq-aydın túrde jetkeriw imkaniyatın beredi. Sonday-aq, “Baraka” sociallıq kartası arqalı napaqa qarjıların qabıl etiw puqaralarǵa óz tólemlerin onlayn baqlaw hám olar haqqındaǵı maǵlıwmatlardan tez paydalanıw imkaniyatın jaratadı. Ulıwma, bul jańalıq mámleketlik sociallıq qamsızlandırıw sistemasın sanlastırıw, sociallıq tólemlerdi basqarıw mexanizmlerin jetilistiriw hám xalıqqa kórsetilip atırǵan xızmetlerdiń sapasın arttırıwda áhmiyetli qádem bolmaqta.
Qısqasha aytqanda, napaqa tayınlanıwı menen onı alıw procesi de avtomatlastırıladı: “Baraka” kartası bar bolsa – qarjı usı kartaǵa, karta bolmasa – virtual sociallıq kartaǵa ótkeriledi.
Sh.Mamaturopova,
ÓzA