Búgin innovaciyalıq ideyalar tek ǵana jańa ónim hám xızmetlerdi jaratıw emes, al jámiyettegi áhmiyetli mashqalalarǵa ámeliy sheshim tabıwda da úlken áhmiyetke iye bolmaqta. Ásirese, intaker hám kreativ pikirleytuǵın jaslardı qollap-quwatlaw, olardıń ideyaların turmısqa engiziw ushın imkaniyat jaratıw áhmiyetli wazıypalardan biri bolıp esaplanadı.
ÓzLiDeP Qaraqalpaqstan Respublikası Keńesi tárepinen partiyanıń “Kreativ isbilermen jaslar” joybarı sheńberinde aymaqlarda ótkerilip atırǵan tańlawlar mine, usınday qábiletli hám intaker jaslardı anıqlawǵa xızmet etpekte.
Tańlawdıń Qaraózek rayonında bolıp ótken basqıshında Bibinur Bazarbaeva óziniń innovaciyalıq ideyası – «AQUA LOOP» joybarı menen qatnasıp, rayon basqıshında jeńimpazlıqtı qolǵa kirgizdi.
Bibinurdıń «AQUA LOOP» joybarı búgingi kúnde barǵan sayın úlken áhmiyetke iye bolıp atırǵan suw resurslarınan aqılǵa uǵras paydalanıw máselesine qaratılǵan.
Joybar tiykarında dush hám qol juwıwdan payda bolatuǵın kúlreń suwdı jıynaw, arnawlı filtrler arqalı tazalaw hám onı qayta texnikalıq maqsetlerde, atap aytqanda, hájetxana bachoginde paydalanıw imkaniyatın beretuǵın qurılma islep shıǵılǵan.
Qurılmada suw úsh basqıshta tazalanadı. Birinshisi – mexanikalıq filtr shash, jip hám basqa iri bólekshelerdi uslap qaladı. Ekinshi – biologiyalıq filtr organikalıq zatlardı tarqatadı. Úshinshi – ximiyalıq filtr bolsa suwdaǵı iyis hám reńdi azaytıp, juwmaqlawshı tazalaw procesin ámelge asıradı. Bunnan soń tazalanǵan suw gravitaciya kúshi tiykarında hájetxana bachogine jiberiledi.
Joybardıń jáne bir áhmiyetli tárepi – qurılma gravitaciya kúshinen paydalanǵan halda islewi, yaǵnıy qosımsha elektr energiyasın talap etpeytuǵını bolıp esaplanadı. Sonday-aq, onı ámeldegi injenerlik infrastrukturasına integraciyalaw názerde tutılǵan.
«AQUA LOOP» tıń áhmiyeti onıń tek teoriyalıq ideya bolıp qalmay atırǵanında. Joybar partiya tárepinen qollap-quwatlanıp, ámeliyatqa engizilmekte.
Házirgi waqıtta qurılma tájiriybe sınaq túrinde Qaraózek rayonında qurılıp atırǵan kóp qabatlı turaq jaylarǵa ornatılmaqta. Bul bolsa jas isbilermenniń innovaciyalıq ideyasın real sharayatta sınaqtan ótkeriw, onıń nátiyjeliligin bahalaw hám keleshekte jáne de jetilistiriw imkaniyatın beredi.
Joybardıń tiykarǵı maqsetli auditoriyası da áyne kóp qabatlı turaq jaylar, miymanxanalar, ofis hám jumıs imaratları, mámleketlik mákemeler sıyaqlı suwdan paydalanıw joqarı bolǵan obektlerdi qamtıp aladı.
Isbilermen jastıń atap ótiwinshe, keleshekte qurılmanı bunnan bılay da jetilistiriw, óndiris kólemin arttırıw hám suwdı únemlewge qaratılǵan bul sheshimdi keńirek kólemde engiziw rejelestirilgen.
«AQUA LOOP» joybarı partiyanıń jaslardı isbilermenlikke keńnen tartıw, olardıń innovaciyalıq hám kreativ ideyaların qollap-quwatlaw baǵdarındaǵı baslamaları ámeliy nátiyje berip atırǵanın kórsetedi.
Eń áhmiyetlisi, bunday joybarlar jaslardı tek ǵana isbilermenlikke emes, al jámiyettegi bar mashqalalarǵa jańasha qatnas jasap, olarǵa innovaciyalıq sheshim izlewge iytermeleydi.
Bibinur Bazarbaevanıń «AQUA LOOP» joybarı bolsa bir jastıń kreativ ideyası qanday etip partiya járdeminde ámeliy joybarǵa aylanıwı múmkin ekenliginiń ayqın úlgisi bolıp esaplanadı.
Qaraqalpaqstan xabar agentligi