Ózbekstan Respublikası Prezidentiniń 2020-jıl 24-noyabrdegi “Sud hújjetleri hám basqa da uyımlardıń hújjetlerin orınlaw sistemasın bunnan bılay da jetilistiriw ilajları haqqında”ǵı pármanına muwapıq Májbúriy orınlaw Byurosınıń aymaqlıq basqarmalarında, atap aytqanda, Qaraqalpaqstan Respublikası basqarmasında da pármanda belgilengen wazıypalardı orınlawshı Ayrıqsha áhmiyetli jumıslardı orınlaw sektorı shólkemlestirilgen. Soǵan bola, sektorǵa mashqalalı kreditlerdi óndiriw ushın qosımsha 20 qánigelestirilgen mámleketlik orınlawshı shtat birligi ajıratılǵan bolıp, olar tárepinen orınlaw hújjetleri tiykarında mashqalalı kreditlerdi óndiriw jumısları alıp barılmaqta.
Sonıń ishinde, usı jıldıń ótken 7 ayı dawamında bólim tárepinen sud qararlarına tiykarlanıp kommerciyalıq banklerdiń paydasına kredit qarızdarlıqların óndiriwge baylanıslı jámi 404 milliard 307 million sumlıq 10 mıń 417 orınlaw hújjetiniń orınlanıwı támiyinlengen bolıp, ámelde 171 milliard 814 million sum óndirildi.
Sonday-aq, qalǵan orınlaw hújjetleriniń orınlanıwın támiyinlew maqsetinde 110,3 milliard sumlıq 5 225 orınlaw hújjeti boyınsha kredit qarızdarlıǵın óndiriw qarızdar fizikalıq táreplerdiń miynet haqısına qaratılıp, qarızdarlıqlar qaplanbaqta.
Sonday-aq, mámleketlik orınlawshılar tárepinen qarızdarlarǵa tiyisli bolǵan, jámi 185 milliard 396 million sumlıq 600 kóshpes múlk, awıl xojalıǵı texnikaları, avtotransport quralları hám basqa da múlkler tiyisli tártipte xatlawǵa alınıp, elektron onlayn-aukcion sawdalarına satıw ushın shıǵarıldı.
Sonnan, 23 milliard 373 million sumlıq 224 múlk aukcion sawdalarında satılıp, satıwdan túsken pul qarjıları kredit qarızdarlıqların qaplawǵa qaratılǵan.
Sonday-aq, aukcion sawdalarında qarıydar tabılmaǵanlıǵı sebepli satılmaǵan 83 milliard 649 million sumlıq 249 múlk óndiriwshi banklerdiń balansına ótkerip berilgen.
Házirgi kúnde 132 milliard 258 million sumlıq 102 múlk boyınsha aukcion sawdaları dawam ettirilmekte.
Máselen, Májbúriy orınlaw byurosı Qaraqalpaqstan Respublikası Ayrıqsha áhmiyetli orınlaw islerin orınlaw bólimi is júrgiziwindegi, Puqaralıq isleri boyınsha Nókis rayonlar aralıq sudınıń 2026-jıl 13-aprel kúngi qarızdar “A.E.” JShJdan AK “Ózsanaatqurılısbank” paydasına 469 million sum óndiriw belgilengen.
Usı orınlaw hújjeti orınlanıwın támiyinlew maqsetinde qarızdarǵa 15 kúnlik ıqtıyarıy múddet berilgen, sonday-aq, qarızdarǵa tiyisli bolǵan bahası 740 million sumlıq kóshpes múlk bólim mámleketlik orınlawshısı tárepinen tiyisli tártipte xatlawǵa alındı.
Soǵan qaramastan, qarızdar tárepinen orınlaw hújjeti talabı ıqtıyarlı túrde orınlanbaǵanlıǵı sebepli, xatlanǵan kóshpes múlk elektron onlayn-aukcion sawda maydanshası arqalı satıwǵa shıǵarıldı.
Bul múlkler ótkeriletuǵın aukcion sawdalarında satılǵan jaǵdayda satıwdan túsken pul qarjıları bank shólkeminiń paydasına ótkeriliwi támiyinlenedi.
Puqaralıq isleri boyınsha Nókis rayonlar aralıq sudınıń 2025-jılı 4-aprel kúngi qararı menen qarızdar K.M.dan “Biznesti Rawajlandırıw banki” AKB paydasına 308,6 mln. sum kredit qarızdarlıǵın óndiriw, óndiriwdi FENGON S508 EVR markalı elektromobilge qaratıw belgilengen.
Májbúriy orınlaw byurosı Qaraqalpaqstan Respublikası Ayrıqsha áhmiyetli orınlaw islerin orınlaw bólimi tárepinen qarızdarǵa orınlaw hújjetiniń talabın orınlaw ushın 15 kúnlik ıqtıyarıy múddet berilip, sud qararınıń orınlanıwın támiyinlemew aqıbetleri túsindirildi.
Usı múddet ishinde qarızdar tárepinen kredit óz waqtında qaytarılmaǵan. Nátiyjede orınlaw hújjeti talabı orınlanbaǵanlıǵı sebepli qarızdardıń kreditke alınǵan avtomashinası bólim mámleketlik orınlawshısı tárepinen tiyisli tártipte xatlawǵa alınǵan hám elektron onlayn-aukcion sawda maydanshası arqalı satıwǵa shıǵarıp jiberildi.

Qaraqalpaqstan xabar agentligi