Nókis qalasında da «DMO Karakalpakstan» jámiyetlik birlespesi tárepinen Evropa Awqamı, Konrad Adenauer fondı hám «Yuksalish» háreketiniń járdeminde ámelge asırılıp atırǵan «Jaslar hám hayal-qızlar – Qaraqalpaqstanda turaqlı turizm elshileri” joybarı sheńberinde shólkemlestirilgen biznes ideyalar tańlawınıń jeńimpazların sıylıqlaw máresimi bolıp ótti.
Onda Nókis qalası hám Xojeli rayonı hákimlikleriniń, shańaraq hám hayal-qızlar, jaslar isleri bólimleriniń wákilleri, mákan puqaralar jıyınlarınıń baslıqları, turizm biznesi wákilleri, jámiyetlik shólkemler, ǵalaba xabar quralları, joybar qatnasıwshıları arasında másláhát ushırasıwı shólkemlestirilip, turizmdi turaqlı rawajlandırıw, jergilikli turǵınlardıń talapların hám keleshektegi birge islesiw perspektivaların dodaladı.
Ushırasıwdı «DMO Karakalpakstan» jámiyetlik birlespesiniń direktorı M.Qosnazarov ashıp berip, jaslardıń hám hayal-qızlardıń Qaraqalpaqstanda turaqlı turizmdi rawajlandırıwǵa qaratılǵan baslamaların qollap-quwatlaw áhmiyetli ekenligin atap ótti.
Sonday-aq, joybardıń maqseti, ótkerilgen oqıw treninglerdiń hám biznes ideyalar tańlawınıń nátiyjeleri haqqında maǵlıwmatlar berildi.
Ushırasıwda qatnasıwshılar jańa turizm baslamaların ámelge asırıw hám regionnıń turistlik tartımlılıǵın arttırıw ushın mámleketlik hákimiyat uyımları, biznes hám jámiyetshiliktiń háreketlerin birlestiriw áhmiyetli ekenligin atap ótti.
Á.Jiyemuratov,
Qaraqalpaqstan xabar agentligi