Qaraqalpaqstanda jaslardıń isbilermenlik baslamaların hám innovaciyalıq ideyaların qollap-quwatlaw, olardı zamanagóy biznes joybarların ámelge asırıwǵa xoshametlew baǵdarında izbe-iz jumıslar alıp barılmaqta. Ózbekstan Liberal-demokratiyalıq partiyasınıń “Kreativ isbilermen jaslar” joybarı sheńberinde ótkerilgen tańlaw da mine, usı maqsetke qaratılǵan áhmiyetli baslamalardan biri boldı.
Tańlawdıń qala hám rayonlardaǵı basqıshlarında 263 máhálleden 3228 jas óziniń startap, isbilermenlik hám sociallıq joybarları menen qatnastı. Qatnasıwshılar tárepinen alǵa qoyılǵan ideyalar arasında qorshaǵan ortalıqtı saqlaw, jańa jumıs orınların jaratıw hám xalıq ushın talap joqarı bolǵan ónimler islep shıǵarıwǵa qaratılǵan joybarlar da salmaqlı orın iyeledi.
Nókis qalası basqıshında jeńimpazlıqtı qolǵa kirgizgen Jadıra Bolegenovanıń joybarı bolsa ekologiyalıq mashqalaǵa isbilermenlik kózqarası menen itibarǵa ılayıq.
Onıń “Eko pufik” dep atalǵan startap joybarı plastikalıq shıǵındılardı qayta islew hám olardan pufikler islep shıǵarıw ideyasına tiykarlanǵan. Joybardıń áhmiyetli tárepi sonda, onda shıǵındı sıpatında qaralıp atırǵan plastikalıq materiallar hám gezleme qaldıqlarınan paydalanıp, jańa ónim jaratıw názerde tutılǵan.
Bul arqalı bir waqıttıń ózinde bir neshe máseleni sheshiw múmkin. Atap aytqanda, plastikalıq shıǵındılardı qayta islew arqalı qorshaǵan ortalıqqa unamsız tásirdi azaytıw, xalıq ushın arzan ónim islep shıǵarıw hám joybardı keńeytiw esabınan jańa jumıs orınların jaratıw imkaniyatı payda boladı.
– Men plastikalıq shıǵındılardı tek ǵana jıynaw emes, al olardan paydalı ónim jaratıwdı aldıma maqset etip qoyǵanman. Usı arqalı hám ekologiyalıq mashqalanı sheshiwge, hám jańa jumıs orınların jaratıwǵa úles qosıwdı qáleymen, – deydi Jadıra.
Házirgi waqıtta ekologiyalıq taza hám qayta islengen materiallardan tayarlanǵan ónimlerge qızıǵıwshılıq artıp atırǵanı bunday startaplardıń bazarda óz ornın tabıwı ushın imkaniyat jaratpaqta. Jadıranıń joybarı da ideyanıń sociallıq áhmiyetin isbilermenlik imkaniyatları menen úylestirgenligi menen ajıralıp turadı.
Jas isbilermenniń baslaması partiya tárepinen qollap-quwatlanbaqta. Sebebi, “Kreativ isbilermen jaslar” joybarınıń tiykarǵı maqseti de jaslardıń jańa ideyaların anıqlaw, olardı isbilermenlikke tartıw hám perspektivalı baslamaların ámelge asırıwǵa járdemlesiwden ibarat.
Jadıra Bolegenovanıń “Eko pufik” joybarı bolsa jaslardaǵı kreativ qatnas hám isbilermenlik ideyası jámiyet ushın paydalı baslamaǵa aylanıwı múmkin ekenliginiń jáne bir ámeliy úlgisi bolıp esaplanadı.
Amangúl Esemuratova,
ÓzLiDeP Qaraqalpaqstan Respublikası Keńesi
Jámiyetshilik penen baylanıslar, málimleme siyasatı hám ideologiyalıq isler bóliminiń baslıǵı
Qaraqalpaqstan xabar agentligi