Bizge belgili, Ózbekstan Respublikası Miynet kodeksiniń 300-statyasında xızmetkerdi intizamıy juwapkershilikke tartıwdıń 2 túri keltirilgen. Bular ulıwma hám arnawlı esaplanadı.
Tashkent mámleketlik yuridikalıq universiteti Yuridikalıq klinikasınıń xızmetkeri Aygerim Aripbaeva bul boyınsha tómendegishe túsinik berdi:
Ulıwma intizamıy juwapkershilik Miynet kodeksi hám ishki miynet tártip qaǵıydaları menen tártipke salınatuǵın juwapkershilik bolıp, ol xızmetkerge usı Kodekstiń 312-statyasında názerde tutılǵan intizamıy jaza sharalarınan birin qollanıwdan ibarat hám barlıq xızmetkerlerge qollanıladı. Bunnan ózi ushın arnawlı intizamıy juwapkershilik belgilengen shaxslar buǵan kirmeydi.
Arnawlı intizamıy juwapkershilik xızmetkerlerdiń tek ayrıqsha kategoriyaları ushın nızamda, sonday-aq, intizam haqqındaǵı ustavlar hám rejelerde názerde tutılǵan jáne xızmetkerge tiyisli nızamda, intizam haqqındaǵı ustavta hám rejede názerde tutılǵan intizamıy sharalardı qollanıwdan ibarat juwapkershilik bolıp tabıladı.
Sonday-aq, Miynet kodeksinde intizamıy jaza ilajları keltirip ótilgen bolıp, oǵan bola: sógis, ortasha aylıq miynet haqınıń otız procentinen kóp bolmaǵan muǵdarda járiyma, ishki miynet tártibi qaǵıydalarında xızmetkerge ortasha aylıq miynet haqınıń eliw procentinen kóp bolmaǵan muǵdarda járiyma salınıw jaǵdayları názerde tutılıwı múmkin hám miynet shártnamasın biykarlaw sıyaqlılar kiredi.
Xızmetkerdiń miynet haqısınan járiymanı uslap qalıw jumıs beriwshi tárepinen usı Kodekstiń 269 hám 270-statyalarınıń talaplarına boysınǵan halda ámelge asırıladı. 313-statyaǵa muwapıq xızmetkerge tek bir sociallıq qılmıs ushın bir intizamıy jaza sharası qollanılıwı keltirip ótilgen. Miynet kodeksiniń 299-statyasında intizamıy jazanıń ámel etiw múddeti dawamında xızmetkerge xoshametlew ilajları, sonıń ishinde miynetke haqı tólew sistemasına kirmeytuǵın hám miynet nátiyjelerine tiykarlanbaǵan sıylıqlar da (bayramlar, sonıń ishinde kásiplik bayramlar, yubileyler múnásibeti menen hám basqalar) qollanılmaydı.
Bunnan juwmaq shıǵarıwımız múmkin, bayram pulları xoshametlew esaplanadı hám intizamiy jaza alǵan xızmetkerge bular berilmeydi. Eger járiyma túrindegi intizamıy jaza qollanılsa, aylıq miynet haqısınıń belgili bir bólegi uslap qalınıwı múmkin.
Tiykar: Miynet kodeksiniń 300, 312, 269, 270, 313, 299-statyaları.
Gulnoza Boboeva, ÓzA