Piyshembi – huqıqbuzarlıqlardıń aldın alıwǵa qaratılǵan profilaktika kúni sheńberinde Qaraqalpaqstan Respublikası Bajıxana basqarmasınıń “Dawıt-ata” shegara bajıxana postında gezektegi úgit-násiyat jumısları alıp barıldı.
Ilaj dawamında post xızmetkerleri tárepinen júk avtotransport qurallarınıń aydawshılarına bajıxana shegarası arqalı tovar-materiallıq baylıqlardı alıp ótiw tártibi, belgilengen normalar hám olardıń dáwirliligi haqqında tolıq maǵlıwmatlar berildi. Sonday-aq, bajısız alıp ótiliwi belgilengen normalardan artıq tovarlar ushın óndiriletuǵın bajıxana tólemleriniń túrleri hám ámeldegi stavkaları boyınsha da túsinikler berildi.
Aydawshılarǵa tovarlardı belgili bir haqı ushın bajıxana shegarasınan nızamsız túrde alıp ótiwge urınıw korrupciya jaǵdayı ekeni, bunday háreketler bolsa jınayıy juwapkershilikke sebep bolatuǵını haqqında ayrıqsha eskertildi.
Ilaj sońında puqaralardan gúmanlı yamasa nızambuzıwshılıq jaǵdaylarına dus kelgen jaǵdayda 11-08 qısqa nomeri hám Bajıxana basqarmasınıń (+998 61) 224-90-86 isenim telefon nomerlerine múrájat etiwi soraldı.
Qaraqalpaqstan xabar agentligi