Respublikamızda gaz tarmaqların gúzgi-qısqı máwsimge tayarlaw, tozıwı jetken gaz tarmaqların jańasına almastırıw, artıqsha texnikalıq gaz joǵaltıwlardıń aldın alıw baǵdarında keń kólemli jumıslar qolǵa alınǵan.

– Búgingi kúnde Xojeli rayonında 25 mıńnan aslam xojalıq tábiyiy gazden paydalanıp kelmekte, – deydi Xojeli rayonlıq gaz támiynatı bóliminiń jetekshi injeneri Paraxat Yusupov. – Tutınıwshılarǵa rayonlıq gaz támiynatı balansındaǵı uzınlıǵı 960 kilometrlik gaz tarmaqları arqalı tábiyiy gaz jetkerip berilmekte.

Házirgi waqıtta qıs aylarında gaz basımı menen baylanıslı mashqalalardıń aldın alıw, tutınıwshılarǵa úzliksiz hám qáwipsiz tábiyiy gaz jetkerip beriw maqsetinde 17 mıńnan aslam tutınıwshını tábiyiy gaz benen támiyinlewshi «Xojeli» gaz bólistiriw stanciyasınan «Vodnik» posyolkasına shekemgi aralıqtaǵı 17 kilometrlik gaz tarmaǵınıń 10 kilometrlik bólegin almastırıw maqsetinde «Hududgaztámiynat» akcionerlik jámiyeti tárepinen jańadan diametri 273 hám 219 millimetrlik gaz tarmaqları kelip basladı.

«Hududgaz Qaraqalpaqstan» gaz támiynatına qaraslı Qurılıs-montajlaw basqarması tárepinen házirgi waqıtta qurılıs rekonstrukciya jumısları baslap jiberildi. Usı jumıslar tolıq juwmaqlanǵannan soń tábiyiy gaz benen baylanıslı mashqalalar saplastırılıp, tutınıwshılarǵa gúzgi-qısqı aylarda úzliksiz tábiyiy gaz jetkerip beriliwi názerde tutılǵan.

Á.Jiyemuratov, Qaraqalpaqstan xabar agentligi