Ózbekstan kásiplik awqamları Federaciyası Qaraqalpaqstan Keńesiniń májilisler zalında «Ekologiyalıq belsendi kásiplik awqamı jámááti» tańlawında jeńimpaz bolǵanlardı sıylıqlaw ilajı ótkerildi.
Bul ilaj Ózbekstan kásiplik awqamları Federaciyası Qaraqalpaqstan Keńesi tárepinen ótkerilip, onda kásiplik awqamlarına aǵza mákeme hám shólkemlerde islewshi xızmetkerler qatnastı.
Ilajdı ótkeriwden maqset – kárxanalarda hám shólkemlerde qorshaǵan ortalıqtıń qáwipsizligin támiyinlew hám tábiyiy resurslardan aqılǵa uǵras paydalanıw boyınsha jumıslardıń nátiyjeliligin arttırıw, toparlarda ekologiyalıq mádeniyattı kóteriw, bul boyınsha kásiplik awqamlarınıń ornın jáne de kúsheytiw, sonıń menen birge, «Jasıl mákan» ulıwma milliy joybarın keńnen qollanıw hám «jasıl ekonomika»ǵa ótiw processlerinde kásiplik awqamlarınıń belsendi qatnasıwın támiyinlegen halda, ekologiyalıq baslama menen shıǵıp atırǵan kásiplik awqamları jámááti arasında salamat básekilik ortalıǵın payda etiw hám olardı múnásip xoshametlewge itibar qaratılǵan.
Kásiplik awqamları tek ǵana xızmetkerlerdiń mápin qorǵawǵa emes, al olardıń ekologiyalıq dúnyaqarasın sáwlelendiriwge de ayrıqsha itibar qaratpaqta.
Atap ótilgenindey, tańlaw sheńberinde kásiplik awqamları tárepinen bir qansha salmaqlı jumıslar ámelge asırıldı. Atap aytqanda, kásiplik awqamları baǵın jaratıw sheńberinde kárxanalar menen mákemelerdiń aymaǵında kóplep miyweli hám sayamanlı terek nálleriniń egiliwi, jumıs ornında energiyanı hám suwdı únemlewshi ilajlar alıp barılıp atırǵanlıǵı, jumıs ornında zıyanlı faktorlardı azaytıw, xızmetkerlerdiń salamatlıǵın saqlaw hám qáwipsiz miynet sharayatın támiyinlew boyınsha jámáátlik shártnaması sheńberindegi wazıypalar tolıq orınlanbaqta.
Ilajlarda tańlawdıń Qaraqalpaqstan Respublikası basqıshında jeńimpaz bolǵanlar múnásip tárizde sıylıqlandı.
Á.Jiyemuratov,
Qaraqalpaqstan xabar agentligi