Mektep bosaǵasına birinshi qádem qoyıp atırǵan hár bir bala ushın 1-sentyabr umıtılmas kún bolıp esaplanadı.
Birinshi qońıraw, jańa klass bólmesi, birinshi ustaz hám jańa kitaplar qatarında jáne bir quwanıshlı dástúr – “Prezident sawǵası” da birinshi klass oqıwshıların kútip aladı. Bul iygilikli baslama arqalı mıńlaǵan balalarǵa bilim alıw ushın zárúr oqıw quralları toplamı berilip, olardıń bilimlendiriwge bolǵan qızıǵıwshılıǵı hám dáslepki qádemleri qollap-quwatlanadı.
Bıyılǵı 2026-2027-oqıw jılı ushın mólsherlengen “Prezident sawǵası” 12 túrdegi oqıw quralınan ibarat. Mektepke shekemgi hám mektep bilimlendiriwi ministrligi baspasóz xızmetiniń málim etiwinshe, oqıw quralları 15-avgustqa shekem barlıq aymaqlarǵa, 25-avgustqa shekem bolsa mekteplerge tolıq jetkerip beriledi. Sawǵalar dástúriy “Birinshi qońıraw” ilajınan soń 1-klass oqıwshılarına tapsırıladı.
Oqıw quralları mámleketlik, mámleketlik emes hám basqa da uyımlarǵa qaraslı mekteplerdiń barlıq 1-klass oqıwshılarına jetkeriledi. Jańa oqıw jılında 795 mıńnan aslam balanı 1-klassqa qabıl etiw rejelestirilgen. 5-avgust jaǵdayına bola, 680 mıńnan aslam bala mektepke qabıl etilgen, bul rejeniń 85 procentin quraydı.
Muhayyo Toshqoraeva, ÓzA