Ózbekstan hám Qazaqstan arasında sawda-ekonomikalıq baylanıslardı bekkemlew, investiciyalıq birge islesiwdi keńeytiw, sanaat kooperaciyasın rawajlandırıw boyınsha alıp barılıp atırǵan jumıslardıń kólemi keńeymekte.
Qazaqstannıń “Atameken” Milliy isbilermenler palatası basshılıǵındaǵı delegaciyanıń Tashkent qalasına saparı sheńberinde Ózbekstan-Qazaqstan biznes-forumı bolıp ótti.
Ilajda Ózbekstan Sawda-sanaat palatasınıń baslıǵı Davron Vahobov, “Atameken” Milliy isbilermenler palatası prezidiumınıń baslıǵı Kanat Sharaplaev, mámleketlik uyımlar hám tarmaq birlespeleriniń basshıları, sonday-aq, 300 den aslam isbilermen toparlardıń wákilleri qatnastı.
Forum dawamında sawda-ekonomikalıq hám investiciyalıq birge islesiwdi keńeytiw, sanaat kooperaciyasın rawajlandırıw hám eksport potencialın arttırıw máseleleri dodalandı, delinedi Sawda-sanaat palatasınıń maǵlıwmatında.
Atap ótilgenindey, 2025-jıldıń juwmaqlarına bola, Ózbekstan hám Qazaqstan arasındaǵı óz-ara sawda kólemi 4 milliard 969 million AQSh dolların qurap, 2024-jılǵa salıstırǵanda 11,4 procentke artqan.
Forumda Qazaqstannıń qurılıs, agrosanaat, jeńil sanaat, mashina qurılısı, logistika, medicina, málimleme-kommunikaciya texnologiyaları hám basqa da baǵdarlarda jumıs alıp baratuǵın 100 den aslam jetekshi kompaniyalarınıń wákilleri qatnastı.
M.HOJIAKBAROVA, ÓzA